Törkiyä iq’tisadınıñ 3 yıllıq yul kartası açıqlandı

Yılmaz başqala Änkarada İlbaşı qolliyäsendä 2025-2027nçe yıllarnıñ urta möddätle programmasın açıqladı.

Cäwdät Yılmaz : "İnflyaśiyäneñ êtaplı räweştä ber sanğa töşerüne maqsat itäbez”, - dide.

İlbaşı urınbasarı Yılmaz ağımdağı yıl öçen üseş maqsatınıñ 3,5% buluın äytte.

Yılmaz üseş yulınıñ dezinflyaśiyä barışı belän ahäñle buluın iskärtep uzdı.

Yılmaz: "Yaña urta möddätle programma çorı Törkiyäneñ iq’tisadi qorılışın (strukturasın) nığıtu häm totrıqlı üseş maqsatlarına ireşü öçen yasalaçaq möhim adımnarnı üz êçenä ala”, - dip äytte.

İlbaşı urınbasarı Yılmaz: "2024nçe yılda töbägebezdä artqan kiyerenkeleklärneñ yoğıntısı belän üseşneñ 3,5% külämendä buluı kötelä. 2025nçe yılda üseş külämeneñ 4%, 2026 häm 2027dä isä 4,5% häm 5% däräcäsenä citüe planlaştırıla. Urta möddätle programma çorıbız däwamında 2,3 million östämä êş belän tä’min itüneñ buldırıluı küzdä totıla. Bu maqsat üseş potenśialıbıznı arttırğan bulsa, êşsezlekne êtaplı räweştä kimetäçäk”, - dide.

Yılmaz:

"Yıl axırında êksportıbıznıñ 264 milliard dollarğa, çor axırında isä 320 milliard dollarğa citüen kötäbez. Urta möddätle programma çorı azağında 83 trillion törek lirası külämendä iq’tisadi zurlıq, 1 trillion 774 milliard dollarlıq iq’tisadi küläm häm 20 meñ dollar miqdarına citkän ber keşegä turı kilän tulayım tabışnı maqsat itäbez.

İmportıbıznıñ yıl axırında 345 milliard dollardan urta möddät programması çorı azağında 417 milliard dollar däräcäsenä citüen kötäbez. Programma çorı axırında byudjet defiśıtınıñ milli tulayım tabışqa qarata külämeneñ ozın möddät urta kürsätkeçennän tübängä 2,5% külämendä azayuın maqsat itäbez”, - dip äytte.

Yılmaz 2024nçe yıl öçen inflyaśiyä külämeneñ 41,555qa kimüeneñ kötelüen, 2025nçe yıl öçen maqsatnıñ 17,5% bularaq yañartıluın belderde.