Misır ilbaşı Törkiyägä kilä

Änkarağa 12 yıldan soñ Misırdan däwlät başlığı däräcäsendä säfär yasala. Törkiyä ilbaşı Räcäp Tayyip Ärdoğannıñ çaqıruına cawap itep bügen Misır liderı Abdulfättax äs-Sisi berençe tapqır kilä.

Ärdoğan wazıyfadaşın Bäştäpädäge rezidenśiyäsendä tantana belän qarşı alaçaq.

İke ilbaşı Törkiyä-Misır yuğarı däräcäle strategik xezmättäşlek şurası cıyılışın citäkläyäçäk.

İllär arasında 10 milliard dollarğa citkän säwdä äyläneşendä yaña maqsat - 15 milliard dollar. Oçraşuda aña ireşüdä yasalaçaq adımnar qaralaçaq. Ênergetika, sälamätlek, turizm häm saqlanu sänäğate mäydanında ozaq waqıtlı xezmättäşlek mömkinlekläre xaqında söyläşenäçäk.

İzrailneñ Ğazzädäge genośidı häm töbäkkä gumanitar yärdämnär dä - säfärneñ könüzäk temaları. Ärdoğan häm Sisi utnı tuqtatu tiz arada täêmin itelsen öçen yasalaçaq adımnar turında fiker alışaçaq.