Törkiyädä internet qullanu kürsätkeçläre

Törkiyädä bıyıl 16 yäş’tän 74 yäş’kä qadärge keşelärneñ internet qullanu däräcäse 88,8%qa citte. İlneñ statistika oyışması “Öylärdä mäğ’lümati texnologiyälär qullanunı tikşerü”neñ näticälären iğ’lan itte.

Annan kürengänçä, 16 yäş’tän 74 yäş’kä qadärge ir-atlar arasında internet qullanu 92,2%, xatın-qızlarda bu san - 85,4%.

Axırğı 1 yıl êçendä şäxsi maqsattan räsmi dairälärneñ internet säxifälären häm quşımtaların qullanuçı, internet aşa däwlät xezmätlärennän faydalanuçılarnıñ küläme dä artqan. Andıylar - 73,3%.  

İnternet aşa tovar häm xezmät satıp alu (êlektron säwdä) 2023nçe yılda 49,5% bulsa, bıyıl 51,7%qa citkän.

İnternet aşa belem alu, hönär üzläşterü däräcäse isä uzğan yılğı kürsätkeçlärdän 4,9%qa kimegän häm 13,9% täşkil itkän.

İñ küp qullanıluçı xäbärläşü häm sośial’ media quşımtaları arasında berençe urında “WhatsApp” - annan 86,2% keşe faydalana. Şunnan soñ 71,3% belän “YouTube” häm 65,4% belän “Instagram” kilä.