Boğaziçi universitetında Ğazzä konferenśiyäse
Boğaziçi universitetında oyıştırılğan konferenśiyädä "ğadälät häm xalıqara xoquq” tikşerelde
İstanbulda TRT Törkiyä teleradiokompaniyäseneñ Global elemtä urtağı bulğan Boğaziçi universitetınıñ xoquq fakul’tetı oyıştırğan "Ğazzädän soñ xalıqara xoquqnı yañadan uylaw” konferenśiyäsendä “Ğadälät (yustiśiya) häm xalıqara xoquq” isemle utırış ütkärelde.
Amerika Quşma Ştatlarındağı Princeton universitetında xalıqara xoquq belgeçe häm Berläşkän Millätlär Oyışmasınıñ êlekke keşe xoquqları xisapçısı, politolog professo Richard Falk konferenśiyädä İzrailneñ Ğazzädäge ğamällären kisken räweştä tänqıytläp, xalıqara xoquqnıñ Ğazzädäge krizisnı êffektiv räweştä qarawdağı uñışsızlığın iskärtep uzdı.
Xalıqara xoquqnıñ rolenä, xäzerge kimçeleklärenä häm tağın da köçleräk ütälü mexanizmnarına bulğan ixtıyacğa basım yasawçı Falk: "Genośid däwam itä häm töbäktä Ğazzä belän turıdan-turı bäyläneşle tağın da kiñ qolaçlı cimergeç suğış yanawı arta baruçı borçılu çığanağına äylände”, - dip äytte.
Falk İzrailneñ xalıqara qararlarnı açıqtan-açıq sanğa suqmawın häm global’ cämğiyätneñ bu qanunnarnıñ ütäleşendäge köteklekne tänqıytläp: "İzrail genośidnı tuqtataçaq häm Ğazzädäge, Yordannıñ könbatış üzänlegendäge häm Könçığış Qodüstäge yawnı beteräçäk wäqalätle qararlarnı böten keşe aldında sanğa suqmadı”, - dide.
BMO toraq xoquqı maxsus xisapçısı Balakrishnan Rajagopal da çığışında Ğazzädä häm başqa bäreleş töbäklärendäge sistemalı toraq cimerelüeneñ yoğıntısına basım yasadı.
