Ärdoğan: “Xäniyägä mäkerle höcümne xökem itäm”

Ärdoğan “Xamas” liderı Xäniyäneñ yawız niyätle höcüm näticäsendä şähit itelüe arqasında sośial’ media akkauntınnan qayğınamä belän urtaqlaştı.

Ärdoğan yullamasında:

"“Xamas” säyäsi byuro başlığı İsmäğil Xäniyägä qarşı Tähranda yasalğan mäkerle höcümne kisken räweştä gäyeplim häm xökem itäm. Bu höcüm Fälästin däğwasın, Ğazzäneñ danlı qarşılıq kürsätüen häm fälästinle qardäşlärebezneñ xaqlı köräşen uñışsız qıluğa, fälästinlelärne demoralizaśiyäläwgä, alarnı qurqıtuğa yünälgän cirängeç omtılış.

Moña qadär Şäyex Äxmäd Yasingä, Abdülaziz Äl Rantisigä häm tağın bik küp ğazzäle säyäsmängä yasalğan cirängeç höcümnärneñ maqsatı nindi bulsa, İsmäğil Xäniyä qardäşemä oyıştırılğan höcümneñ maqsatı da şul, läkin sionist varvarlıq bügengä qadär bulğanı kebek maqsatlarına yänä ireşä almayaçaq.

İslam dönyasınıñ tağın da köçleräk totışı häm keşelekneñ ittifaqı belän, inşallah, İzrailneñ geografiyäbezdä qılğan terrorçılıq, şul isäptän Ğazzädäge zolım häm genośid motlaq räweştä betäçäk, töbägebezdä häm dönyabızda tınıçlıq urnaşaçaq. Monıñ öçen Törkiyä bularaq böten yullarnı häm işeklärne sınap qarawnı, fälästinle qardäşlärebezne böten mömkinleklärebez, böten köçebez belän yaqlarğa däwam itäçäkbez.

1967nçe yıldağı çiklär nigezendä, başqalası Könçığış Qodüs bulğan, irekle, suveren häm bäysez Fälästin däwläteneñ tözelüe öçen êşlärğä däwam itäçäkbez. Cirängeç höcüm näticäsendä şähit bulğan qardäşem İsmäğil Xäniyägä Allahınıñ yarlıqawın sorıym, ğailäsenä sabırlıq telim, ğazzäle häm fälästinle qardäşlärebez belän İslam dönyasınıñ qayğısın urtaqlaşam. Allah Täğalä ocmaxı häm maturlığı belän fatixasın birsen”, - dip äytte.