"Berdänber maqsatıbız - töbäkne tiz arada terror oyışmalarınnan çistartu”

Törkiyä milli saqlanu ministrı Yaşar Gülär terrorçılar bu geografiyädän yuqqa çıqqançı terrorçılıqqa qarşı köräşneñ qatğıy räweştä däwam itäçägen belderde.

Ul bu xaqta Gäbzä texnik universitetında 2023-2024 uqu yılı açılışında yasağan çığışında citkerde.

Ministr üz çığışında uzğan atna azağında Änkarada êçke êşlär ministrlığı qarşında bulğan uñışsız terror omtılışına tuqtaldı.

Yaşar Gülär poliśiya xezmätkäreneñ şunduq cawap birep 2 terrorçını täêsirsez xälgä kiterüen äytte.

”Bu höcüm xain terror oyışmasınıñ soñğı tıpırçınuları buluın tağın ber tapqır kürsätte. Terrorçılıqqa qarşı köräş terrorçılar bu geografiyädän yuqqa çıqqançı qatğıy räweştä däwam itäçäk”,-dide ministr.

Gülär äytüençä, Törkiyä öçen iñ möhime – töbäktä tınıçlıq häm totrıqlılıq täêmin itü.

“Bez barlıq kürşelärneñ çiklären xörmät itkän kebek Ğıyraq häm Süriyäneñ dä cir bötenlegen yaqlıybız. Berdänber maqsatıbız - töbäkne tiz arada terror oyışmalarınnan çistartu”,- dide Törkiyä milli saqlanu ministrı Yaşar Gülär.