İlbaşı Ärdoğan BMO Ğomum şurasına möräcäğät itte

İlbaşı Ärdoğan Amerika Quşma Ştatlarınıñ N’yu-York (Нью-Йорк) qalasındağı BMO Ğomum Şura zalında 78nçe General’ Assambleya utırışlarında qatnaşuçılarğa möräcäğät itte.

BMO Ğomum särkätibe Antonio Guterreşneñ "2nçe Bötendönya suğışınnan soñ tözelgän oyışmalarnıñ bügenge dönyanı çağıldırmawı” turındağı bilgeläwenä (билгeләвeнә) Törkiyäneñ dä quşıluın äytüçe Ärdoğan: "İminlek Şurası, monnan arı dönya iminlegeneñ ışanıçı buludan tuqtap, 5 ilneñ säyäsi strategiyäläreneñ bäreleşü mäydanına äylände”, - dip äytte.

BMOnıñ äydäp baruçanlığında dönyanıñ iminlegen, xozurın, mullığın täêmin itü belän wazıyfalı oyışmalarnı tiz yañadan üzgärtep qoru zarurlığına basım yasawçı (ясaучы) Ärdoğan: "Geografiyäse häm demografiyäse belän dönyadağı böten kilep çığışlarnı (tamırlarnı), ışanularnı, mädäniyätlärne wäkillek itü sälätenä iyä global’ citäkçelek miğmarisen (arxitekturasın) tözergä tiyışbez”, - dide.

2022nçe yılnıñ fevral’ ayınnan birle däwam (дәвам) itüçe Rusiyä-Ukraina suğışına da tuqtalıp uzuçı Ärdoğan monıñ Ukrainanıñ bäysezlege häm cir bötenlege nigezendä, diplomatiya häm dialog belän beterelüe öçen Törkiyäneñ alıp barğan tırışuların tağın da arttırıp däwam (дәвам) itteräçägen belderde.

Törkiyä Däwlät başlığı Süriyäneñ cir bötenlege häm säyäsi berdämlege öçen iñ zur qurqınıçnıñ bu il östendä xisabı bulğan köçlärneñ kontrolendäge terror oyışmalarına kürsätelgän açıq yärdäm buluın iskärtep uzdı häm: "Süriyä häm Ğıyraq belän bergä Yaqın Könçığışta, Tön’yaq Afrikada häm Säxildä üz mänfäğätläre öçen “DEAŞ”nı häm oxşaşların şirma itep qullanuçılarnıñ ikeyözlelegennän tuydıq”, – dip äytte.

Ärdoğan barı tik üz säyäsi, iq’tisadıy mänfäğätläre öçen terror oyışmaları belän êşlärgä däwam (дәвам) itüçe illärneñ terrorçılıqtan häm bäyläneşle problemalardan zarlanu xoquqınıñ bulmawın bilgeläp uzdı.

Yaqın Könçığışta daimi tınıçlıqnıñ urnaşa aluınıñ barı tik Fälästin-İzrail problemasınıñ soñğı çişeleşe belän mömkin bulaçağına işarät itüçe Ärdoğan: "1967nçe yıldağı çiklär nigezendä bäysez häm geografik bötenlekkä iyä Fälästin däwläte tormışqa aşmıyça İzrailneñ dä êzlägän xozurnı häm qurqınıçsızlıqnı taba aluı qıyın”, - dip äytte.

"Bez berkemneñ xaq-xoquqına küz salmıybız, berkemneñ dä xaq-xoquqlarıbıznı sanğa suqmawına yul quymıybız, röxsät itmäyäçäkbez”, - dip äytüçe Ärdoğan xalıqara cämäğätçelekne Tön’yaq Kipr Törek Cömhüriyäteneñ bäysezlegen tanırğa, bu il belän diplomatik, säyäsi häm iq’tisadi bağlanışlar urnaştırırğa çaqırdı.

İlbaşı Törkiyäneñ Awrupa Berlege äğ’zalege belän bäyle bularaq ta: "Awrupa Berlegennän kötkänebez ilebezgä qarata yöklämälären tiz ütäwe (үтәвe), Törkiyägä qarata ikele-mikele totışlarnıñ beterelüe zarur”, - dide.

Azärbaycan-Ärmänstan mönäsäbätlärenä dä tuqtalıp uzuçı İlbaşı Ärdoğan ike il arasındağı söyläşü barışın baştan birle yaqlawların, fäqät (фәкать) Ärmänstannıñ bu tarixi forsatnı qullana almawın bilgeläp uzdı.

Zängäzur koridorınıñ açıluı belän ber rättän Ärmänstannıñ birgän süzlären ütäwen (үтәвeн) kötülären belderüçe Ärdoğan: "Monnan arı härkemneñ qabul itkäne kebek Qarabax Azärbaycan cire. Monnan tış başqa ber statusnıñ terätelüe hiç qabul itelmäyäçäk”, - dide.