İlbaşı Ärdoğannıñ Macarstan (Vengriya) säfäre

Ärdoğannıñ Orbannıñ çaqıruı qısalarında kitkän Macarstan (Vengriya) başqalası Budapeştta Karmelita monastırendä ütkärelgän söyläşü waqıtında Törkiyä-Macarstan (Vengriya) mönäsäbätläre belän bergä Törkiyäneñ Awrupa Berlegenä tulı äğ’zalek barışı belän regional’ häm global’ täräqqıyätlär quzğatıldı.

Ärdoğan säfäre qısalarında Budapeştta Üzbäkstan İlbaşı Şäwkät Mirziyayıv häm yanındağı wäkillek belän dä küreşep söyläşte.

Söyläşü waqıtında Törkiyä belän Üzbäkstan mönäsäbätläre belän ber rättän regional’ häm global’ täräqqıyätlärgä tuqtalıp uzıldı.

Räcäp Tayyip Ärdoğan soñınnan Serbiya İlbaşı Aleksandr Vuçiç belän küreşte.

Oçraşuda Törkiyä-Serbiya mönäsäbätläre häm regional’ mäs’älälär söyläşelde.

İlbaşı Ärdoğan söyläşü waqıtında, Balkannıñ tınıçlığı häm totrıqlılığı cähätennän Serbiyanı açqıç il bularaq kürüen belderep, Törkiyä-Serbiya mönäsäbätläreneñ tarixındağı iñ yuğarı däräcäsenä citüen iskärtep uzdı.

Şuşı söyläşülärdän soñ 2023 Budapeşt Bötendönya ciñel atletika çempionatınıñ irlär arasında 100 metr yarışınıñ finalen qarawçı İlbaşı Ärdoğan stadionda Azärbaycan Däwlät başlığı İlham Äliyıv häm Qatar Ämire Şäyıx Tämim bin Hamäd Al Sani belän äñgämä qordı.

Ärdoğan Budapeştta Macarstan (Vengriya) İlbaşı Katalin Novak belän dä küreşep söyläşte.

İlbaşı Ärdoğannıñ Macarstannıñ qorılu könen (Vengriyağa nigez salu könen) täbrik itkän oçraşu waqıtında ike il mönäsäbätläre belän regional’ häm global’ mäs’älälär quzğatıldı.

Ärdoğan Bosniya-Hersegovina Däwlät başlığı şurası äğ’zase Jel’ka Śviyanoviç (Цвиянович) häm Bosniya-Hersegovinadağı ike sub’yekttan (субъекттан) berse bulğan Serb Cömhüriyäte başlığı Milorad Dodikne qabul itte.

Oçraşuda Törkiyä belän Bosniya-Hersegovina arasındağı ike yaqlı mönäsäbätlär häm xäzerge xezmättäşlekneñ arttırıluı öçen yasala alınaçaq adımnar söyläşelde.

Törkiyä Däwlät başlığı Budapeşttağı oçraşularınnan soñ Törkiyägä qayttı.

Şul uq waqıtta Ärdoğan Macarstan (Vengriya) säfäre belän bäyle bularaq sośial (социаль) media akkauntınnan urtaqlaşqan yazmasında:

"Bügen strategik urtağıbız häm NATO berlektäşebez Macarstannıñ (Vengriyanıñ) tözelüeneñ yıllığı belän Bötendönya ciñel atletika çempionatı çaraları mönäsäbäte belän Budapeştta idek. Säfärebez waqıtında Macarstan (Vengriya) Däwlät başlığı häm Baş ministrı belän çaqırılğan başqa däwlät häm xökümät başlıqları belän oçraştıq”, - dip belderde.

Macarstan (Vengriya) belän nigezle häm nıq duslıq bağlanışlarına tayanğan kiñ qırlı mönäsäbätlärgä iyä bulularına basım yasawçı Ärdoğan bolay dip bilgeläp uzdı:

"Mönäsäbätlärebezneñ här ölkäsendä möhim alğarışlarnı tormışqa aşırabız. İke yaqlı säwdäbez, 2022nçe yılda 3 milliard yarım dollar däräcäsenä citep, böten waqıtlarnıñ iñ yuğarı däräcäsenä ireşte. Urtaq tırışularıbız belän 6 milliard dollar säwdä küläme maqsatına da qısqa waqıtta ireşäçägebezgä ışanam. İke yaqlı mönäsäbätlärebezne böten yaqları belän küzdän kiçergän, mönäsäbätlärebezne tağın da alğa taba alıp baru maqsatınnan çığıp yasayaçaq adımnarnı qarap çıqqan säfärebezneñ uñışlı buluın telim".