Türkiyä tışqı êşlär ministrı Rusiyäle wazıyfadaşı belän söyläşte

Söyläşü waqıtında Lavrov Fidannı yaña wazıyfası belän täbrik itte.

Rusiyä tışqı êşlär ministrlığınnan yasalğan belderüdä taraflarnıñ ike ilneñ tışqı êşlär ministrlıqları arasındağı konstruktiv üzara bäyläneşne däwam itterergä äzer buluların raslawları citkerelde.

Belderüdä: “Söyläşü waqıtında zur ênergetika proyıktlarına yünälep, Xökümätlärara säwdä häm iq’tisadi xezmättäşlek komissiyalarınıñ êşçänlege belän bergä Rusiyä-Türkiyä xezmättäşlegeneñ töp mäs’äläläre xaqında fiker alışıldı. Kiläçäktäge ike yaqlı oçraşularnıñ kalendar-planı qarap uzıldı. Könüzäk xalıqara häm regional’ mäs’älälär quzğatıldı,” – dip äytelde.

Türkiyä Tışqı êşlär ministrı Xaqan Fidan Awrupa Berlegeneñ tışqı mönäsäbätlär häm iminlek säyäsäte yuğarı wäkile Jozep Borrel’ belän dä telefonnan söyläşte.

Ministrlıqtan citkerelgän mäğ’lümatkä kürä, Borrel’ ministr Fidannı yaña wazıyfası belän täbrik itte.

Söyläşü waqıtında ayıruça Türkiyä-Awrupa Berlege mönäsäbätläre häm regional’ waqıyğalar quzğatıldı.

Awrupa Berlege yuğarı wäkile Borrel’ dä “Twitter” akkauntınnan urtaqlaşqan yazmasında: "Konstruktiv häm ike yaqlı fayda täêmin itüçe Awrupa Berlege-Türkiyä mönäsäbätşären tüsemsezlek belän kötäbez. Geopolitik awırlıqlar şaqtıy ölkädä yaqın xezmättäşlegebezne zarur qıla. Könçığış Urta diñgezdä totrıqlılıq häm iminlek bik ähämiyätle,” – dip äytte.

Awrupa Berlege komissiyasınıñ kiñäyüdän cawaplı äğ’zase Oliver Varhelyi dä “Twitter” akkauntınnan yasağan belderüendä tışqı êşlär ministrı Fidannı yaña wazıyfası uñayınnan qotladı.

Fidan belän ağımdağı problemalarda yaqın xezmättäşlek urnaştıru häm Türkiyä belän mönäsäbätlärne tağın da nığıtu öçen forsatlar tabu mäs’äläsendä kileşülären belderüçe Varhelyi Fidannıñ Türkiyägä çaqıruın şatlanıp qabul itüen citkerde.

Moritaniya tışqı êşlär ministrı Möxämmäd Salim Märzuk häm Cibuti tışqı êşlär ministrı Mäxmüd Ali Yosıf ta Xaqan Fidannı qotladı.