Ärdoğan yaña kabinetı belän berençe cıyılışın uzdırdı

İlbaşı Räcäp Tayyip Ärdoğan konstituśiyägä üzgäreş kertü täq’dimen qabat Türkiyä Böyek Millät Mäclesenä kertäçäklären äytte. Ul kiçä yaña kabinetı belän täwge cıyılışınnan soñ belderülär yasadı.

Ärdoğan şimbä könne il êçennän häm tışınnan 5 meñnän artıq qunaq qatnaşında wazıyfasına kereşü tantanası uzdıruların xäterlätep: “Çarada, bigräk tä, çit illärdän qatnaşuçılarnıñ däräcäse häm sanı ğadättägedän yuğarıraq buluı ilebez öçen ğorurlıq xis itterde,”-dide.

Ärdoğan şatlıqlı könnärdä genä tügel, awır çaqlarda da yärdämennän taşlamawçı Türkiyäneñ çın duslarına il häm millät isemennän räxmät äytte. “Meñnärçä çaqrım yıraqlıqtan kilep kürsätkän iltifatların berqayçan da onıtmayaçağımnı belülären telim,”-dide ul.

İlbaşı yaña çorda da xalıqqa birgän barlıq wäğ’dälären ütäyäçäklären belderde häm saylawlardan alda kön üzägenä kilgän konstituśiyägä tözätmä kertüne parlamentqa qabat täq’dim itäçäklären söyläde.

Ärdoğan ênergetikadağı adımnarın däwam itteräçäklären, investiśiyä, citeşterü, êksport, mäşğul’lek häm üseşkä zıyan kitermiçä, törek iq’tisadın tağın da köçäytäçäklären assızıqladı.  

“İnflyaśiyä arqasında kilep tuğan tormış qıybatçıllığı häm çamadan tış yuğarı bäyälär problemasın barlıq aspektları belän xalqıbıznıñ könüzägennän çığaru öçen täwäkkäl qaraşta torabız,”-dide ul.  

Ärdoğan suğıştan häm terrorçı oyışmalarnıñ höcümnärennän qaçıp Türkiyägä sıyınğan möhacirlärneñ imin räweştä, üz teläkläre belän häm kimsetelmiçä töp watannarına qaytularına êtärgeç biräçäklären citkerde.