Ärdoğan belän Stoltenberg närsä turında söyläşte?

Türkiyä ilbaşı Räcäp Tayyip Ärdoğan belän NATO ğomum särqatibe Yens Stoltenbergnıñ İstanbulda Dolmabaxçä ofisında uzğan oçraşuı tögällände. Matbuğatqa yabıq işeklär artında bulğan äñgämä yaqınça 1 säğat’ däwam itte.

Söyläşüdä regiondağı wäzğıyät’lär häm, ayıruça, Şveśiyäneñ NATOğa kerüe mäs’äläse qaraldı.

Oçraşuda Türkiyä tışqı êşlär ministrı Xakan Fidan, milli saqlanu ministrı Yaşar Gülär, ilbaşı apparatı süzçese İbrahim Kalın häm NATO wäqalätleläre qatnaştı. Soñınnan Stoltenberg matbuğat ähelläre qarşına çıqtı. NATO citäkçese Şveśiyäneñ äğ’zalıq prośessı belän bäyle bularaq Türkiyäneñ qurqınıçsızlıq borçuları barlığın äytte. “Bez bu borçılularnı beläbez, Şveśiyä bolarnı beterü öçen ähämiyätle adımnar yasadı,”-dide ul.

NATO ğomum särqatibe Türkiyä, Şveśiyä häm ittifaqnıñ wäkilläreneñ 12nçe iyün’dä oçraşaçağın belderde.

Stoltenberg Türkiyäneñ NATOğa ähämiyätle öleş kertüen assızıqladı.

“Türkiyäneñ Kosovodağı NATO ğaskärlärenä östäp berlek cibärü qararı öçen räxmätlemen. Türkiyä andağı tırışlıqlarnı äydäp bara,”-dide Yens Stoltenberg.