Ärdoğan maqsatlar xaqında belderde

Türkiyä ilbaşı Räcäp Tayyip Ärdoğan Awrupadan Qara diñgezgä, Kavkaz häm Yaqın Könçığıştan Tön’yaq Afrikağa qadär Türkiyäneñ äylänä-tiräsendä iminlek häm tınıçlıq qırşawı tözergä maqsat itep quyuların söyläde. Ul başqala Änkarada Türkiyä säwdä palataları häm birjalar berlegeneñ 79nçı ğomum şurasında çığış yasadı. Ärdoğan anda ilneñ qarşısındağı qıyınlıqlarnı bergäläp çişü öçen urtaq aqıl belän êş itäçäklären belderde.

“Êşmäkärlek dön’yası, cämğıyät’ häm säyäsät institutı belän qulğa-qul totınışıp, küñeldän berläşep, inşallah, Türkiyä ğasırın töziyäçäkbez,”-dide ul.

Ärdoğan yuğalğan mullıqnı kompensaśiyäläyäçäk adımnar yasarğa qararlı buluın äytep bolay dide:  “Watandaşıbıznı inflyaśiyägä izdertmäw säyäsätebezne däwam itäbez. Yuğarı inflyaśiyä mäs’äläsen ber sanlı kürsätkeçlärgä töşerep xalqıbıznı ciñel sulış aldıruçı bez idek, qabat bez bulaçaqbız. Global’ iq’tisadtağı dulqınlanular tuqtağaç, monıñ uñay näticälären küräçäkbez”.

Ärdoğan kabinet formalaşqannan soñ çit illärgä säfärlären başlayaçağın häm Türkiyägä kilergä tiyeşle dön’ya liderlarınıñ barlığın da belderde.

“Maqsatıbız Awrupadan Qara diñgezgä, Kavkaz häm Yaqın Könçığıştan Tön’yaq Afrikağa qadär Türkiyäneñ äylänä-tiräsendä iminlek häm tınıçlıq qırşawı tözü” -dide Türkiyä ilbaşı.

Ärdoğan soñğı çorda säyäsi şantaj bularaq qullanıluçı viza problemasın da tiz arada çişäçäklären citkerde.