Dön'ya liderları Ärdoğannı ciñüe belän qotlıylar

Küp il liderları Räcäp Tayyip Ärdoğannı ilbaşı saylawınıñ ikençe turında ciñüe belän qotladılar.

Tön’yaq Kipr Törek Cömhüriyäte ilbaşı Ärsin Tatar Ärdoğannıñ uñışlarınıñ Tön’yaq Kipr Törek Cömhüriyäte häm Könçığış Urta diñgezdä totrıqlılıq öçen bik möhim buluın assızıqladı.

Azärbaycan ilbaşı İlham Aliyev Ärdoğanğa telefonnan şaltırattı, anı saylawdağı uñışları belän qotladı häm yaqında Azärbaycanğa kötep qaluın äytte. Aliyev äytüençä, saylaw näticäläre Ärdoğannıñ kiñ qolaçlı säyäsätenä häm bäyäläp betergesez xezmätlärenä birelgän iñ zur büläk.

Törki däwlätlär oyışması ğomum särqatibe Kubaniçbäk Ömüraliyev Ärdoğanğa qotlaw xatı cibärde.

Ul üz xatında Türkiyä häm törki dön’ya ğasırınıñ nigez taşları salınaçaq kiläse çorda Ärdoğanğa uñışlar teläde, saylaw näticäläreneñ Türkiyä xalqı häm törki dön’ya öçen faydalı buluın teläde.

Rusiya Federaśiyäse däwlät başlığı Vladimir Putin Räcäp Tayyip Ärdoğannı qabattan ilbaşı wazıyfasına saylanuı belän qotlap, bu uñışnıñ Ärdoğannıñ Türkiyä ilbaşı bularaq fidakar’ tırışlığınıñ tabiği näticäse buluın äytte.

Qıtay däwlät başlığı Si CinpiñÄrdoğannı qabat ilbaşı bulıp saylanuı belän qotladı , Türkiyä belän Qıtaynıñ ike zur il bularaq kiñ qırlı urtaq mänfäğat’lärne urtaqlaşuların äytte.

Amerika Quşma Ştatları ilbaşı Djo Bayden Twitter akkauntında bolay dip yazdı:” Türkiyä ilbaşı Räcäp Tayyip Ärdoğannı qabat saylanuı belän qotlıym. NATO berlektäşläre bularaq, min ike yaqlı häm urtaq global’ mäs’älälär östenda bergä êşläwne däwam itärbez dip kötäm”.

Franśiya ilbaşı Êmmanuêl’ Makron Ärdoğannı Twitter akkauntında törekçä täbrik itte.

Germaniya kanślerı Olaf Şol’ś Twitter akkauntındağı belderüendä ”Germaniya häm Türkiyä - yaqın partnyerlar häm berlektäşlär, şul uq waqıtta bezneñ köçle sośial’-iqtisadi bäyläneşlärebez bar. Ärdoğannı qabat saylanuı belän qotlıym” dip citkerde.

Angliya prem’yer-ministrı Rişi Sunak Ärdoğannı ciñüe belän täbrik itte, ike ilneñ nıqlı xezmättäşlekne däwam itüne tüzemsezlek belän kötüen äytte.

NATO ğomum särqatibe Yens Stoltenberg, Awrupa Berlege şurası başlığı Mişel’ Şarl’, Awrupa berlege komissiyäe başlığı fon der Leyen Ärdoğannı qabat ilbaşı bulıp saylanuı nisbätennän täbrik ittelär.

Katar, Tön’yaq Makedoniya, Norvegiya, Şveśya, Ukraina, Paqıstan, Liviya, Aljir, Senegal, Kot-d’İvuar, Serbiya, Törekmänstan, Üzbäkstan, Vengriya, Venesuêla, İran, Fälästin, Albaniya, Kosovo, Ğıyraq, Somali, Gruziya, Livan, Tunis, Belarus’, Sudan, Yordaniya, Ärmänstan, İzrail, Bosniya Gerśegovina, Moldova, Gvineya Bisau, Braziliya, Bel’giya, Kuveyt, Beläşkän Ğaräp Ämirlekläre, Avstriya, Niderland, İtaliya, Mal’ta, Oman, Baxreyn, Soğud Ğaräbstanı, Yämän, Zambiya, Argentina, Paragvay, Kuba, Boliviya, Êkvador, Gvatemala, Dominikan Cömhüriyäte, Kolumbiya, Meksika, Peru, Sal’vador, Kosta-Rika,Qırğızstan liderları Räcäp Tayyip Ärdoğannı ilbaşı saylawınıñ ikençe turındağı uñışları belän qotladılar.