Türkiyä tawış birä

Bügen Türkiyädä ilbaşı saylawnıñ ikençe turı.

Türkiyä säyäsi tarixında täwge tapqır ilbaşı saylawları ikençe turğa qaldı. Tawış birülär il külämendä cirle waqıt belän säğat’ 8dän başlandı.

Saylawda Türkiyäneñ 5 yıl buyınça wazıyfa başqaraçaq däwlät başlığı bilgelänäçäk. Anda 14nçe maydağı berençe turda iñ küp tawış alğan Cömhür ittifagınıñ kandidatı Räcäp Tayyip Ärdoğan häm Millät ittifağınıñ kandidatı Kämal Kılıçdaroğlu yarışaçaq.

Çit ildä terkälgän yaqınça 3 million yarım törek watandaşı öçen 73 ildäge 151 wäkillektä 167 noqtada ärcälär quyılğan ide. Anda tawış birü 24nçe mayda tögällände. Byulleten’ tutırılğan ärcälär oçqıçlar häm diplomatik kur’yerlar belän Türkiyägä kiterelde. Alar başqala Änkarada saylaw üzägendä saqlana häm bügen ildä tawış birü tögällängännän soñ başqa byuleten’tär belän bergä açılıp sanalaçaq.

Çik buyındağı tamğaxanälärdä tawış birü isä, Türkiyädäge şikelle, säğat’ kiçke 5kä qadär däwam itäçäk.

İlbaşı Räcäp Tayyip Ärdoğan häm xatını Äminä Ärdoğan İstanbulda tawış birde.

Millät ittifağınıñ ilbaşı kandidatı häm Çömhüriyät xalıq partiyäse ğomum räise Kämal Kılıçdaroğlu belän xatını Sälvi Kılıçdaroğlu isä başqala Änkaradağı saylaw uçastoğına bardı.

Üzäk saylaw komissiyäse başlığı Äxmät Yänär ilbaşı saylawınıñ ikençe turı öçen başqala Änkarada tawış birgännän soñ belderü yasadı häm bügenge saylawnıñ 14nçe maydağı berençe turğa qarağanda tağın da irtä näticälänäçägen uylawların äytte.