Tawışlar sanı berençe turdağıdan kübräk

Türkiyädä ilbaşın saylawnıñ 28nçe mayda uzaçaq ikençe turında çit illärdä tawış birgän törek watandaşlarınıñ sanı kiçä kiç 1 million 889 meñ 398gä citte. Çit illärdä tawış birü prośessı, Amerika Quşma Ştatları tışında, tögällände. Saylawçılar çit illärdäge wäklilleklär häm çik buyı tamğaxanälärendä 20nçe maydan başlap tawış birä başladı.

Çittä yäşäwçe törek watandaşlarınıñ saylawğa iğ’tibarı soñğı köndä dä arttı. Saylawnıñ berençe turında 1 million 839 meñ 470 keşe çit il wäkillekläre häm tamğaxanälärdä quyılğan ärcälärgä kitte. Bu yulı älege kürsätkeç tawış birü tögällängänçe ük uzdı. İlbaşı saylawınıñ ikençe turı öçen çik buyı tamğaxanälärendä tawış birü äle 28nçe may kiçke säğat’ 5kä qadär däwam itä.