Aşlıq koridorı qabat açıq

BMO Qara diñgez aşlıq kileşüe nigezendä Urtaq koordinaśiyä üzägendä kontrol’lärneñ qabat başlanuın citkerde.

Berläşkän Millätlär oyışması ğomum särqatibe süzçese urınbasarı Farxan Xaq köndälek matbuğat cıyılışında yäkşämbe häm düşämbe kontrol’lär uzdırılmawın, aşlıq tutırğan korablarnı kontrol’ aşa ütkärüneñ citdi räweştä töşüen häm 1nçe maydan birle kön sayın 2,9%qa artqa qalınuın söyläde. Ul xäzerge waqıtta törek yarları buyında 26 korabnıñ kötep toruın häm bolarnıñ tulayım 1 million 157 meñ 974 tonna aşlıq häm azıq-tölek belän tulı buluın assızıqlıy.  

Farxan Xaq kiçä çıqqan korablarnı qabat kontrol’dän ütkärü başlanuın citkerde. “BMO häm Türkiyä barlıq yaqlar belän kergän häm çıqqan korablarnıñ xäräkäten ciñeläytü öçen yaqınnan êşçänlek alıp bara,”-dide ul.

Xaq prośeduranıñ kiläçäge belän bäyle söyläşülärneñ dä däwam itüen, yuğarı däräcäle cıyılışlarnıñ İstanbulda uzuın da äytep uzdı. BMO ğomum särqatibe Antonio Guterriş häm törkeme Vladimip Putinğa aşlıq koridorınıñ däwamı turında xat yazğan. Älegä aña räsmi cawap yuq.

Milli saqlanu ministrlığı Türkiyä, Rusiyä, Ukraina häm BMO arasındağı oçraşunıñ 10-11nçe mayda İstanbulda uzaçağın citkergän ide.