Altun: “Türkiyä - global’ teläktäşlekneñ ürnäge buldı”

Türkiyäneñ 6nçı fevral’da Kahramanmaraş êpiśentrlı 7,7 häm 7,6 zurlığında ike zur cirteträw belän tetränüen añlatuçı Altun köçe, täêsir mäydanı häm säbäp bulğan cimerülärneñ ülçäme cähätennän “ğasırnıñ fäläkäte” dip bäyälängän bu afättän 14 millionnan kübräk watandaşnıñ zıyan kürüen, 50 meñnän kübräk keşeneñ häläq’ buluın iskä töşerde.

Altun: "Tarixta siräk oçrıy torğan bu zur fäläkät aldında dönyağa ürnäk bulırlıq däräcädä däwlät-millät teläktäşlegen kürsättek. Törek milläten üzençälekle häm ciñelmäs itüçe şuşı teläktäşlek añ-fikere yärdämendä bu awır könnärne ciñep uzdırabız,” – dip äytte.

Altun bolay dip däwam itte:

"Humanitar diplomatiya ölkäsendä dönyada äydäp baruçı rol’ne üz östenä alğan häm törle krizis töbäklärendä dus qulın moxtaclardan qızğanmağan Türkiyä ğasır fäläkätendä ürnäk global’ teläktäşlekkä säxnä buldı.

Yärdäm çaqıruına nigezlänep dönyanıñ dürt ber yağındağı 100dän kübräk il yärdämen täq’dim itte. Yaponiya belän bergä 90ğa yaqın ildän kilgän 10 meñnän kübräk personal zilzilä töbägendä alıp barılğan êzläw-qotqaru êşçänlegenä bulıştı.

Bu xalıqara koaliśiya cirlektä êşläwçe 200 meñnän kübräk aşığıç yärdäm xezmätkärläre belän bergä böten waqıtnıñ iñ zur qotqaru operaśiyasın tormışqa aşırdı."

İlbaşı idaräse êlemtä başlığı Altun, Türkiyä belän Yaponiya arasında 1,5 ğasırğa yaqınayğan duslarça mönäsäbätlärneñ här uzğan kön tağın da nığuına iğ’tibarnı yünältep, bolay dip belderde:

"“Ärtuğrul” fregatınıñ faciğasennän soñ urnaştırılğan şuşı qaqşamas bağlanışnıñ här ölkädä çağılışın kürüdän bez bik şat. Humanitar yärdäm êşçänlege belän cäberlängän geografiyalarnıñ ömet nurına äylängän “yıraq” diñgezlärneñ “yaqın” illäre arasındağı bu bağlanış nıq nigezlärgä tayana.

Bigräk tä krizis mizgellärendä ike ilneñ ber-bersenä suzğan yärdäm qulı bu cähättän bik qıymmätle. Bu uñaydan cirteträwneñ berençe könennän birle yanıbızda bulğan Yaponiyağa, êzläw-qotqaru törkemnäre bulmasın, täêmin itkän igelekle (natural’) häm aqçalata yärdämnär belän bulmasın, bezneñ belän bergä bulğan Yaponiya xalqına yärdämnäre öçen räxmätemne belderäsem kilä."