Xalıqara xezmät oyışmasınnan Türkiyä belän Süriyägä aşığıç yärdäm çaqıruı
Xalıqara xezmät oyışması, 6nçı fevral’dağı Kahramanmaraş êpiśentrlı cirteträwlärneñ Türkiyädä häm Süriyädä küp sanda êş tarmağına häm êşxanägä tiskäre yoğıntı yasawın belderep, bu illärdäge yözlägän meñ êşläwçegä “aşığıç yärdäm” kürsätergä çaqırdı
Xalıqara xezmät oyışması afätneñ xezmät bazarına yoğıntısına qağılışlı xisap bastırdı. Şuşı xisapqa kürä, cimergeç cirteträwlär arqasında Türkiyädä häm Süriyädä yözlärçä meñ êşläwçe yäşäw çığanağı mömkinleklären yuğalttı.
Türkiyä belän bäyle berençe mäğ’lümatlärgä qarağanda, cirteträw arqasında 658 meñ êşläwçe yäşäw çığanağı mömkinlegen yuğalttı, 150 meñnän kübräk êş urını qullanılmaslıq xäldä.
Xalıqara xezmät oyışması farazlarına kürä, zıyan kürgän êşläwçelärneñ härberse êş taba almağan oçraqta här ay yaqınça 230 dollardan kübräk kerem yuğaltuın kiçerä. Şuşı krizis arqasında cirteträw töbägendä ber aylıq 150 million dollar tiräsendä xezmät kereme yuğaltuı xasil buldı.
Türkiyädä cirteträwdän zıyan kürgän vilayätlärdä 4 millionnan kübräk xezmät iyäse yäşägän bulsa, bolarnıñ küpçelege awıl xucalığı, citeşterü sänäğäte, säwdä yäki başqa tübän qıymmätle xezmätlärdä êşli ide.
Süriyädä isä 12 yıl däwam itkän watandaşlar suğışı arqasında bolay da zur zıyan kürgän iq’tisad häm xezmät bazarı şartlarında yaqınça 170 meñ êşläwçe cirteträw säbäple êşen yuğaltqan. Bu yuğaltu turıdan-turı 154 meñ öygä häm 725 meñnän kübräk keşegä täêsir itkän bulsa, 35 meñ tiräsendä mikro, waq häm urta zurlıqtağı êşxanä dä zarar kürgän.
Süriyädäge şuşı waqıtlıça êş belän täêmin itü yuğaltuı ber ayda kim digändä 5 million 700 meñ dollarğa tiñ xezmät kereme yuğaltuına säbäp bula.
Xisapta qaraşları citkerelgän Xalıqara xezmät oyışması Ğomum direktorı Gilbert F. Houngbo bu afätkä qarşı uñışlı häm kiñ qolaçlı köräşneñ iñ möhim elementınıñ êş belän täêmin itügä bulışunıñ buluın belderde.
"Keşelär barı tik yäşäw çığanağı mömkinlekläre yañadan buldırılğan oçraqta ğına tormışların yañadan torğıza başlıy ala,” – dip äytüçe Houngbo Türkiyä belän Süriyädäge xezmät iyälärenä aşığıç häm maxsus yärdäm kürsätelüeneñ zarurlığına basım yasadı.
