Migrantlar çığarğan yanğında 39 keşe ülde
Waqıyğa Meksikanıñ Texas ştatı çige yänäşäsendäge S’yudad Xuares şähärendä bula
Meksikanıñ Amerika Quşma Ştatları çigenä yaqın cirlegendäge möhacirlär üzägendä çıqqan yanğında 39 keşeneñ ğomere özelde.
Meksika däwlät başlığı Andres Manuêl Lopes Obrador matbuğat cıyılışında Texas ştatı çige yänäşäsendäge S’yudad Xuares şähärendä milli migraśiya oyışmasında bulğan waqıyğa turında belderü yasadı. Ul yanğınğa deportaśiyälänü öçen kötep toruçı sıyınuçılar säbäpçe buluın äytte.
“Protest yözennän alar sıyınu urınınıñ işegenä matraslarnı terättelär häm ut törttelär, monıñ zur faciğa kiterep çığaraçağın uylamadılar. Deportaśiyälänäçäklären belüläre öçen monı êşläwlären uylıybız,”-dide ilbaşı.
Meksika milli migraśiya oyışmasınnan belderülärençä, kiçä tön urtasında başlanğan yanğında 39 keşe ülde, 29ı yaralandı. 4 xastaxanägä salınğan yaralılarnıñ xäle awır.
