Ärdoğan aşlıq koridorı turında söyläşülär baruın citkerde
Aşlıqnı Türkiyägä kiterep on yasap Afrika däwlätlärenä cibärü küzallana
İlbaşı Räcäp Tayyip Ärdoğan Qara diñgez aşlıq koridorında Türkiyäneñ uñışınıñ härkemneñ telendä buluın söyläde. Ul şäxsi telekanallarnıñ berdäm turıdan-turı êfirında jurnalistlarnıñ sorawlarına cawap birde, bäyälämälär yasadı.
Ärdoğan Türkiyäneñ diplomatiyädäge uñışınıñ iñ zur ürnägeneñ Rusiyä belän Ukraina buluın citkerde. Anıñça, suğışta aradaşçı däwlät bularaq barmaq belän kürsäterdäy il xäzerge waqıtta Türkiyä genä.
“Xätta möxtäräm (Rusiyä däwlät başlığı Vladimir) Putin belän arabızda uzğan söyläşülär dä açıq häm tögäl. Ul da räxmät yawsın: “Min aşlıq koridorınnan aşlıq cibäräm, tik Awrupağa monıñ 44%ı kitä, kitmäsen. Az üskän Afrika däwlätlärenä cibärik”, dide. Min dä aña “Alaysa sez aşlıqnı cibäregez, bez monda annan on yasıyq häm az üskän däwlätlärgä cibärik” didem. Şuşındıy söyläşüebez bar,”-dip söyläde Ärdoğan.
Türkiyä ilbaşı berniçä könnän Putin belän telefonnan söyläşäçäklären häm anda da nindi adımnar yasarğa ikänen qarayaçaqların äytte. Ärdoğan citkergänçä, aşlamağa da ixtiyac bar. Alarnı da täêmin itü häm dön’ya bazarlarına çığaru öçen tırışaçaqlar.
