Xalıqara xäyriyäçelär kiñäşmäse Türkiyägä külämle yärdäm ışandırdı

Tışqı êşlär ministrı Mäwlet Çavuşoğlu 6nçı fevral’däge cir teträwlär nisbätennän Xalıqara xäyriyäçelär kiñäşmäsendä qabul itelgän yöklämälärneñ Türkiyäneñ torğızılu häm qabat tözelü êşçänleklärenä ähämiyätle öleş kertäçägen belderde. Ul Brüssel’dä uzğan çaradan soñ matbuğat cıyılışı uzdırdı.

Çavuşoğlu konferenśiyäneñ oyıştırıluın başlap yörgän Awrupa Berlege komissiyäse häm Şveśiyä belän älege çarağa teläktäşlek kürsätkän barlıq däwlätlärgä räxmät äytte. “Konferenśiyädä 65 il, 26 xalıqara oyışma häm finans berläşmäse qatnaştı,”-dide ul.

Çarada, bügengä qadär yasalğan yärdämnär tışında, Türkiyä öçen 6 milliard dollardan artıq finanslar bülep birergä ışandırdılar.

“Türkiyä härwaqıt, dön’yanıñ qaysı poçmağında buluına qaramastan, awır xäldä qalğan il häm keşelärgä yärdämgä aşığuçı däwlätlärneñ berse. Şundıy uq teläktäşlek häm sizgerlekne Awrupa Berlege häm xalıqara cämäğat’çelektän kürüebezgä bez şat,”-dide ministr.

Ul yaña toraq punktlarnı tağın da ışanıçlı, nıq, tağın da külämle, yäşel häm aqıllı bularaq töziyäçäklären söyläde. Çavuşoğlu alda ozın häm mäşäqat’le prośess kötüen, tik monı barlıq mömkinleklärne berläşterep, tüzemlelek, nıqlıq belän kiçäçäklären assızıqladı.

“Yuqqa çıqqan cannarnı, älbättä, kire qaytarıp bulmıy. Tik cimereklärneñ urınına tağın da yaxşısın yasayaçaqbız. Bügen alınğan yöklämälär torğızu häm qabat tözü êşçänleklärebezgä ähämiyätle öleş kertäçäk,-dide Türkiyä tışqı êşlär ministrı.