Ärdoğan NATO ğomum särqatibe belän söyläşte
Stoltenberg belän äñgämädä Finlyandiyä häm Şveśiyäneñ NATOğa kerü prośessı xaqında süz bardı
Türkiyä ilbaşı Räcäp Tayyip Ärdoğan NATO ğomum särqatibe Yens Stoltenberg belän telefonnan söyläşte.
İlbaşı êlemtä idaräsennän belderülärençä, äñgämädä Finlyandiyä häm Şveśiyäneñ NATOğa kerü prośessı xaqında süz bardı.
İlbaşı Ärdoğan Finlyandiyä kürsätkän poziśiyäneñ Şveśiyänekennän uñay yaqqa ayırılıp toruın belderde. Şuña kürä älege ilneñ ittifaqqa kerü protokolın Türkiyä Böyek Millät Mäclesendä raslaw prośessın başlaw qararı çığarıldı.
Ärdoğan Şveśiyä belän söyläşülärne yaxşı niyät belän däwam itärgä planlaştıruların, anıñ niçek alğa baraçağınıñ Şveśiyäneñ adımnarı belän bäyle bulaçağın citkerde.
Süz uñayınnan, Finlyandiyäneñ NATOğa kerüe belän bäyle protokolnı ilbaşı Ärdoğan imzaladı häm Türkiyä Böyek Millät Mäclesenä tapşırdı.
NATO ğomum särqatibe Stoltenberg isä üz belderüendä Türkiyäneñ Finlyandiyäne NATOğa alu protokolın parlamentta raslaw prośessın başlarğa qarar qıluına qanäğat’ qaluın äytte. “Bu Finlyandiyäneñ iminlege, Şveśiyäneñ iminlege häm NATOnıñ iminlegen nığıtaçaq. Türkiyä Böyek Millät Mäcleseneñ tiz arada uñay tawış biräçägenä ömetlänäm,”-dide ul.
