Ärdoğan Törki däwlätlär oyışmasınıñ çirattan tış sammitı turında söyläde
Sammit Türkiyädä bulğan cir teträw häm su basu afätlärennän soñ yärdämläşü maqsatınnan cıyılğan ide
Türkiyä ilbaşı Räcäp Tayyip Ärdoğan Törek investiśiyä fondınıñ törki dön’yada iq’tisadi integraśiyägä öleş kertäçägen äytte. Ul başqala Änkarada uzğan Törki däwlätlär oyışması çirattan tış sammitı turında belderülär yasadı.
Ärdoğan çaranı uñışlı uzdıruların, berläşmä äğ’zaları häm küzätüçelär belän Türkiyädä bulğan cir teträw häm su basu afätlärennän soñ yärdämläşü maqsatınnan cıyılışuların söyläde. Ul sammitta qatnaşqan däwlät başlıqlarına räxmät äytte. “Kiçergän hälakättä törki dön’ya tarafınnan kürsätelgän yärdämläşü, berdämlek häm berlekne berqayçan da onıtmayaçaqbız,”-dide Ärdoğan.
Türkiyä liderı maqsatlarınıñ ber yıl êçendä afät töbägendäge toraq ixtiyacın zur külämdä çişäçäk sanda sıyfatlı häm ışanıçlı yortlar tözü buluın belderde.
Ärdoğan törki dön’yada integraśiyäneñ lokomotivı bulğan iq’tisad, säwdä, transport häm ênergetika mäydannarındağı xezmättäşleklärne qarap çığuların citkerde. “Törek investiśiyä fondı tözü kileşüeneñ imzalanuı – sammitnıñ konkret qazanışlarınnan berse. Fond keçe häm urta êşmäkärlek, üseş proyektları, transport häm logistika çılbırları, asqorma proyektları, awıl xucalığı häm turizm mäydanındağı investiśiyälär, yañartıla aluçı ênergiyä êşçänleklärenä yärdäm täêmin itäçäk,”-dide ul.
Ärdoğan Törek investiśiyä fondınıñ törki dön’yanıñ iq’tisadi integraśiyäsenä dä öleş kertäçägen assızıqlıy.
“Tözeläçäk fond İstanbulda urnaşaçaq. Şul räweşle İstanbulnıñ global’ finans cämğıyät’tä uynağan üzäk rolen nığıtunı da täêmin ittek,”-dip söyläde Türkiyä liderı.
