“Törki däwlätlär oyışması barıbıznıñ töşe ide, çınbarlıq buldı"

Türkiyä tışqı êşlär ministrı Mäwlet Çavuşoğlu: “Törki däwlätlär oyışması barıbıznıñ töşe ide, çınbarlıq buldı. Kön ütkän sayın korporativ asqormanı köçäytäbez, xezmättäşlekne yaña mäydannarğa yünältäbez,”-dide. Ul başqala Änkarada ilbaşı rezidenśiyäsendä uzuçı Törki däwlätlär oyışması tışqı êşlär ministrları şurası cıyılışında çığış yasadı.  

Çarada Üzbäkstan tışqı êşlär ministrı wäkile Bäxtiyar Saidov, Azärbaycan tışqı êşlär ministrı Cäyxun Bäyrämov, Qırğızstan tışqı êşlär ministrı Cäänbäk Kulubayev, Qazaqstan tışqı êşlär ministrınıñ berençe urınbasarı Kayrat Umarov, Vengriyä tışqı êşlär häm tışqı säwdä ministrı Peter Siyyarto, Tön’yaq Kipr Törek cömhüriäte tışqı êşlär ministrı Taxsin Ärtuğruloğlu, Törekmänstannıñ İstanbuldağı konsulı Muratgeldi Säyetmammädov häm Törki däwlätlär oyışması ğomum särqatibe Kubanıçbäk Ömüraliyev qatnaştı.  

Çavuşoğlu yäşel texnologiyälär qullanuçı, aqıllı şähärlärgä iyä Törki dön’ya tözü kiräklegen äytep: “Global’ ênergiyä tigezlämäsendäge awırlığıbız arta. Baqı-Tbilisi - Cäyxan neft’ütkärgeçe häm Trans Anadolu tabiğıy gazütkärgeçläre şikelle zur külämle ênergetika proyektların bergä tormışqa aşırdıq. TANAP aşa Xazar regionınnan östämä tabiğıy gaznı xalıqara bazarğa çığaru öçen xezmättäşlekne arttırırğa kiräk,”-dip söyläde. Ul, şulay uq, Azyä qabat alğa çıqqan bu çorda Urta Koridornıñ global’ säwdädäge öleşen kübäytü kiräklegen assızıqladı.

Çavuşoğlu äğ’za däwlätlärneñ iq’tisadlarınıñ sälamät räweştä integraśiyäse öçen Törki investiśiyä fondına ähämiyät birülären äytte. Ministr Ukrainadağı suğış, Äfğanstandağı wäzğıyät’  häm regiondağı başqa problemalarnıñ Törki däwlätlär oyışması äğ’zaların yaqınnan qızıqsındıruın iskärtep: “Berdäm aqıl belän bez tarixnıñ ağımında yuğalırğa tügel, aña yünäleş birergä tiyeş. Tulayım alğanda, berlekne nığıtu şart,”-dide. Çavuşoğlu Tön’yaq Kipr Törek cömhüriyäteneñ küzätüçe däwlät bularaq qatnaşuınıñ bu nisbättän bik mäğ’näle buluın assızıqladı. “Kipr törek xalqınıñ suveren tigezlegeneñ, xoquqlarınıñ häm xalıqara statusınıñ terkälüwe, izolyaśiyä häm çikläwlärneñ beterelüe berdäm tırışlığıbız belän mömkin,”-dide Türkiyä tışqı êşlär ministrı.