Türkiyä ilbaşı süzçese AQŞta çığış yasadı

Türkiyä ilbaşı apparatı süzçese İbrahim Kalın Amerika Quşma Ştatlarınıñ N’yu-York şähärendä säwdä palatasında oyıştırılğan AQŞ-Türkiyä biznes forumında qatnaştı. Üz çığışında ul 6nçı fevral’dä bulğan Kaxramanmaraş cir teträwläreneñ Türkiyä tarixındağı iñ naçar, zamança tarixta terkälgän iñ köçle zilzilä buluın assızıqladı. Kalın ilbaşı Räcäp Tayyip Ärdoğannıñ afättän zıyan kürüçelär öçen 1 yıl êçendä 200 meñ toraq tözergä ışandıruın xäterlätte.

Şul uq waqıtta, süzçe soñğı çordağı iñ awır tabiğıy afättän soñ barı tik öç ay ütügä ğomumi saylawlarnıñ kiçekterelmiçä, waqıtında uzdırıla aluınıñ da iskitkeç buluına iğ’tibarnı yünältte. “Bu çaqlı zur hälakätkä bu qadär yaqın waqıtta başqa ber genä ilneñ dä saylaw uzdırırğa qıyulığı citäçägen uylamıym,”-dide ul.

Kalın Şveyśariyä häm Finlyandiyäneñ NATOğa kerüe mäs’äläsendä Türkiyäneñ poziśiyäse nisbätennän dä fikerlären citkerde. Ul älege ike ilneñ Türkiyäneñ qurqınıçsızlıq borçıluların beteräçäk adımnar yasawı kiräklegen assızıqladı. Ä AQŞnıñ F-16 xärbi oçqıçları belän täêmin itü häm modernizaśiyäläw prośessın da bu tema belän bäyläwen “tulısınça mantıyqsız, qabul itelmäs häm näticäsez” dip bäyäläde.

Kalın ike ilneñ geosäyäsi global’ mänfäğat’läre häm, şul uq waqıtta, NATOdağı mönäsäbätlärneñ strategik ähämiyäte nisbätennän AQŞ Kongressı äğ’zaların Türkiyägä kübräk räsmi säfär yasawların kötülären äytte. Ul Amerikalı êşmäkärlärne ike däwlät arasındağı säwdä äyläneşen arttırırğa çaqırdı. “Türkiyädä biznes dön’yası öçen dustanä moxit bar häm investiśiyä yasağan härkem hiçşiksez otar,”-dide ilbaşı apparatı süzçese İbrahim Kalın.