"NATO qışqı şartlarğa yaraqlı konteynerlar häm çatırlarnı Türkiyägä cibärä"

Türkiyä tışqı êşlär ministrı Mävlüt Çavuşoğlu Türkiyädäge cir teträwlärdän soñ Änkarağa kilgän NATO ğomum särqatibe Yens Stoltenberg belän oçraştı.

Alar üzara küreşep söyläşkännän soñ matbuğat oçraşuı uzdırdılar.

Çavuşoğlu biredä yasağan çığışında NATO inventarendä bulğan qışqı şartlarğa yaraqlı konteynerlar häm çatırlarnı Türkiyägä cibärü qararı qabul itelüen belderde.

” 3 meñ keşegä sıyınu urını biräçäk bu proyekt  6 ay xezmät kürsätäçäk häm kiräk bulsa tağın ozaytılaçaq. Alarnıñ İskändärün häm Hatayda xezmätkä kertelüe küzdä totıla”,- dide Mävlüt Çavuşoğlu.

Çavuşoğlu NATOdan berlektäşlärneñ strategik hawa transportı mömkinleklären tiz arada aktivlaştırunı sorawların da citkerde.

“Ğomum särqatip berlektäşlärdän NATO inventarendä 40 konteyner paketnı häm Paqıstandağı 20 meñ qışqı çatırlarnı tiz arada küçerü öçen kiräkle oçqıçlar belän täêmin itüne soradı. Bez aña monıñ öçen bik räxmätle”,- dide Türkiyä tışqı êşlär ministrı.

Stoltenberg Kahramanmaraş êpiśentrlı cir teträwlärneñ NATO oyışqannan birle (1949) ittifaq territoriyäsendäge iñ qurqınıç, iñ ütergeç afät buluın äytte.  

Ul NATO berlektäşläreneñ Türkiyägä bulışuların däwam itülären assızıqladı.

“Niderland, Norvegiya, Böyekbritaniya häm Amerika Quşma Ştatları xärbi oçqıçları biregä xalıqara yärdäm ireşterü öçen köne-töne êşlilär. Albaniya, Kanada häm Germaniya küp törle finans häm yärdäm ısulların qullanıp yärdäm kürsätüne däwam itälär. NATOnıñ barlıq illärendäge grajdannar Türkiyägä millionlağan yevro küçerü öçen yärdäm akśiyäläre oyıştıralar. Bolar barısı da berdämlek, yärdämläşü, teläktäşlek simvolı” dide NATO ğomum särqatibe Yens Stoltenberg.