Sänğat' dön'yasınnan Türkiyägä teläktäşlek
Mäşhür şäxeslär sośial’ mediada Türkiyägä teläktäşlek yullamaları yasawın däwam itä
Sänğat’ dön’yasınıñ böten dön’yağa tanılğan isemnäre Kaxramanmaraştağı cir teträwdän soñ sośial’ mediada Türkiyägä teläktäşlek yullamaları yasawın däwam itä.
Avstraliyäle aktyer X’yu Djekman zilzilädä zıyan kürgän balalar öçen BMOnıñ balalarğa yärdäm fondı UNİCEF başlağan yärdäm kampaniyäsenä teräk buldı. Ul İnstagram akkauntında älege kampaniyäneñ linkın urtaqlaştı häm bolay dip yazdı: “Yörägem Türkiyä häm Süriyädäge cimergeç teträwdän zıyan kürgän här keşeneñ yanında. Süriyä häm Türkiyädäge balalarğa niçek yärdäm itä aluıñnı beleşü öçen linkka basığız”
AQŞ cırçısı Demi Lovato da İnstagtramdağı 145 million yazıluçısına zilzilädän zıyan kürüçelärgä niçek yärdäm itä aluları turında mäğ’lümat citkerde. “Yörägem qorbannar häm cir teträwdän zıyan kürgän keşelär belän bergä” dip yazdı ul.
AQŞnıñ tanılğan kino yoldızı Djennifer Garner Angliyädäge oyışma “Save The Children”nıñ Türkiyä häm Süriyä öçen başlağan xäyriyä kampaniyäse turında mäğ’lümat urtaqlaştı. “Türkiyä häm Süriyädäge ğailälärgä yärdäm itü yulların êzläsägez, zinhar “Save The Children”nıñ gumanitar yärdäm êşçänlegenä iğ’tibar itegez” dide ul.
Portugaliyäneñ fado muzıkası sänğat’çese Mariza İnstagram bitendä yazıluçılarına Türkiyädäge cir teträw xäyriyä kampaniyäläre xaqında mäğ’lümat birde.
Bollivudnıñ tanılğan yoldızı Alia Bxatt isä Türkiyädäge zilzilä xäbären urtaqlaşıp “Bu yörägemne özgäläde” dip yazdı.
İran çığışlı AQŞ aktrisası Şoxre Agdaşlı üzeneñ ärnüen mondıy süzlär belän citkerde: “Türkiyä häm Süriyädän meñlägän ğayepsez keşeneñ ğomeren özgän zilzilä xäbärlären işetkäç üzägem özelde. Yalğız bulmawların belsennär. Keşeleklelek äle haman yäşägän öçen dön’yanıñ här poçmağınnan yärdäm kilä. Yörägem zıyan kürüçelär yanında”
Hindstan çığışlı Angliyä aktyerı häm komediantı Aasif Mandvi isä Adanada töşerelgän xaräbälär fotosın yazıluçıları belän urtaqlaştı.
