Çavuşoğlu: “Türkiyä belän AQŞ arasındağı êlemtälärne arttırabız”
Türkiyä Tışqı êşlär ministrı Mäwlüt Çavuşoğlu: "Hyuston töbägendä bulğan FETÖ äğ’zaläre belän köräşneñ möhimlegenä tağın ber qat basım yasarğa telim. Watandaşlarıbız belän bergä bu oyışmağa qarşı köräşebezne däwam itteräçäkbez,” – dide.
Amerika Quşma Ştatlarınıñ Teksas ştatınıñ Hyuston şähärendäge Türkiyä baş konsullığınıñ yaña xezmät binası ministr Mäwlüt Çavuşoğlu qatnaşqan tantana belän açıldı.
Çavuşoğlu biredä yasağan çığışında: "Global’ sistema küp krizis kiçergän waqıtta Türkiyä belän AQŞ arasındağı êlemtälärne arttırabız,” – dip äytte.
Ber kön êlek Waşingtonda AQŞlı wazıyfadaşı Êntoni Blinken belän ütkärgän ike yaqlı söyläşügä tuqtalıp uzuçı Çavuşoğlu: "Söyläşülärebezneñ bik näticäle häm ike yaqlı mönäsäbätlärneñ üsterelüe cähätennän faydalı buluın äytergä telim. AQŞ belän “PYD-PKK”, “FETÖ” häm sankśiyälär kebek bez yäşägän qayber problemalar bar. Bolarnı xäl itü öçen dä tırışlıq quyabız. Hyuston töbägendä bulğan “FETÖ” äğ’zaläre belän köräşneñ ähämiyätenä tağın ber qat basım yasarğa telim. Watandaşlarıbız belän bergä bu oyışmağa qarşı köräşebezne däwam itteräçäkbez,” – dip belderde.
Mäwlüt Çavuşoğlu açılış tantanasında, Hyuston cirle räsmi zatlar da çaqırılğan törkemgä möräcäğät itep, Türkiyäneñ bıyıl açaçaq ike baş konsullıq binası belän bergä dönyada 260 wäkilçelekkä ireşäçägen citkerde.
Ministr Çavuşoğlu: "Çit ildä yäşäwçe watandaşlarıbızğa, qawemdäşlärebezgä iñ sıyfatlı xezmätne iñ êffektiv räweştä birä alu – bezneñ prioritetıbız. Bügen bez açıp cibärgän şuşı kanśelyariya binabız Hyuston töbägendä yäşäwçe 30 meñ tiräsendä watandaşıbızğa zur şatlıq êçendä iñ matur xezmätne başqaraçaq. Bügen yaña xezmät binabıznıñ açılışın yasıybız, ämma Hyustondağı baş konsullığıbız 1985nçe yıldan birle açıq,” – dip iskärtep uzdı.
