Çavuşoğlu häm Al Nahyan Äfğanstannı häm Äl’-Äqsanı söyläşte
Türkiyä Tışqı êşlär ministrı Mäwlüt Çavuşoğlu Berläşkän Ğaräp Ämirlekläre tışqı êşlär ministrı Abdullah bin Zayid Al Nahyan belän Äfğanstandağı soñğı xällärne häm Äl-Äqsa mäçetenä yasalğan basqın belän bäyle bularaq kiçä telefon söyläşüen ütkärde
Ministrlıqtan yasalğan belderügä kürä, Çavuşoğlu belän Bin Zayid Äfğanstanda citäkçelekne üz qulında totuçı “Taliban”nıñ xatın-qızlarnıñ belem aluın tıyuı häm xalıqara ictimağıy oyışmalar belän humanitar yärdäm oyışmalarınnan xatın-qızlarnı çitläşterüenä qarata urtaq borçıluların citkerde.
Türkiyäneñ şuşı qarardan waz kiçelüen ömet itüen raslawçı Çavuşoğlu bu mäs’älädä İslam xezmättäşlek oyışması belän bergä koordinaśiyalı tırışularnıñ möhimlegenä basım yasadı.
Bin Zayid isä “Taliban”nıñ bu qararınıñ häm qız balalarınıñ urta belem alu mömkinlegen tıyuçı monnan aldağı qararlarınıñ töp keşe xoquqların bozuın belderde.
Söyläşü waqıtında ministrlar ayıruça İzrailneñ çiktän tış uñçı Milli iminlek ministrı Itamar Ben-Gvirneñ kiçä Äl’-Äqsa mäçetenä bärep kerüen gäyıpläwlären täqrarladı.
Ministrlar, Qodüstäge dini urınnarnıñ statusınıñ häm izgelegeneñ saqlanuı öçen monıñ kebek qabul itelmäslek ğamällärgä qarşı koordinaśiyanıñ arttırıluınıñ möhimlegenä iğ’tibarnı yünältep, Äl’-Äqsanıñ tulısınça saqlaw astına alınuı belän biredä citdi häm provokaśion bozularnıñ tuqtatıluı ixtıyacına basım yasadı.
2 ministr ayıruça İzrail xakimiyäten töbäktäge totrıqsızlıqnıñ azaytıluı öçen cawaplılıqnı üz östenä alırğa çaqırdı.
