"Terrorçılardan tağın ällä närsälär kürersez"

Türkiyä Saqlanu ministrı Hulusi Akar yäkşämbe könne açıqlaw yasap, Franŝiyada tıyılğan "PKK" terror oyışması äğzaläre tarafınnan başlatılğan qırıslıq waqıyğaların ğayepläde.

Hulusi Akar: “Berlektäşlärebez häm qalğan qayber däwlätlär PKK/YPG terror oyışması belän xezmättäşlek başqara. Bez alarğa monıñ zur xata buluın äyttek häm xäzer kürä başladılar. PKK/YPG Süriyädä başqarğan cinayät’lären kürgäç bu terror oyışmasın xuplaw kebek yalğışlarına ükenä başladılar. Xäzer şul uq närsä meñnärçä çaqrım yıraqlıqta, Parijda küzätelä. Franŝiya PKK terror oyışmasın yıllar buyı xupladı häm quyınnarına alğan bu yılan xäzer alarnı teşli. Bu terrorçılarnı xuplarğa däwam itegez, tağın ällä närsälär kürersez.”

Comğa könne 69 yäş’lek ber franŝuz Parijnıñ populyar bulğan 10nçı bistäsendä ber mädäniyät üzägenä ut açıp, 3 keşene üterüdä häm 3 keşene yaralawda ğayeplänä. Çit il keşelärenä qarşı patologik näfrät toyuın açıqlağan höcümçe düşämbe könne mäxkämä aldına çığaçaq.

Franŝiyada waqıyğalar däwam itkändä Türkiyä ilbaşı Räcäp Tayyip Ärdoğan migrantlarğa qarata ikelätä standart arqasında Awrupa illären tänqıyt’läde.

Ärdoğan: “Süriyäle, Ğıyraqlı, Afrikalı qaçaqlarğa işeklären açmawçı oyışmalar PKKlı häm FETÖçe terrorçılarğa yaxşı möğamälä kürsätä. 15 iyul’ tönendä 250 watandaşıbıznı şähit itkän tüntäreleşçelär bügen şaqtıy Awrupa ilendä räxätlänep yöri. Separatist terror oyışması här yıl bu illärdä cıyğan millionnarça yevro belän Süriyä, Ğıyraq häm Türkiyägä qarağan höcümnären finanslıy. Xätta üz byudjetlarında turıdan terror oyışmasına yärdäm bülege açqan illär buluın da beläbez. Bilgelämäse, çige, qısası bilgele bulmağan säyäsi sıyınuçı bulıp qılanğan, terrorçılarnı saqlawçı, yaqlawçı, tüntäreleş cinayätendä qatnaşqan keşelär xökemnän qaçırıla. İsemnäre, cinayät’ dos’yeları açıqlanğan şaqtıy qaçqan tüntäreleşçe belän bäyle citkerelgän taläplärgä qaramastan Könbatış illäre bernindi xoquqıy adım yasamadı.”

 İlbaşı idaräse süzçese İbrahim Kalın soŝial’ mediadan yasağan yullamada Franŝiyane terror oyışmasın ilendä totqanı öçen tänqıyt’läde.

“Bu – Franŝiyadäge PKK. Süriyädä sez xuplağan terror oyışması. Soñğı 40 yılda meñnärçä törek häm körd watandaşı häm iminlek köçläre xezmätkärlären ütergän "PKK". Xäzer isä Parij uramnarın mäsxärälilär. Barıber bernärsä dä äytmäyäçäksezme?”

İyun’ ayında açıqlanğan ber Europol xisabına kürä terror oyışması şaqtıy Awrupa ilendä narkobiznes, talau, şantaj, aqça cıyu, äğza cıyu häm belem birü êşçänlekläre belän şöğıl’längän.

Terror oyışmasınıñ qayber äğzaläreneñ Awrupağa kilgänçe başta Süriyä häm Ğıyraqta da belem aluı PKK tudırğan terror yanawın Franŝiya häm Awrupa iminlege öçen tağın da qurqınıç xälgä kiterde.