Şäntop Soğud Ğaräbstanı parlamentı başlığı belän küreşte

Şäntop başqala Änkarada Soğud Ğaräbstanı Şura Mäclese Başlığı Abdullah bin Möxämmäd Al Şäyıx häm yanındağı wäkillek belän üzara häm wäkilleklärara söyläşülär ütkärde.

Söyläşü waqıtında illär arasında ike yaqlı êlemtälärneñ mönäsäbätlärneñ üsterelüe häm xezmättäşlekneñ nığıtıluına öleş kertüen belderüçe Şäntop säyäsät ölkäsendäge bağlanışlarnıñ iq’tisad häm säwdä mönäsäbätlären dä nığıtaçağın bilgeläp uzdı.

Şäntop, Türkiyäneñ ayıruça Farsı qultığı töbägendäge illärneñ iminlegenä häm totrıqlılığına birgän ähämiyätenä tuqtalıp uzıp: "Bez böten töbäktä urtaq tırışu belän uñay atmosferanıñ östenlek itüen maqsat itäbez. Bu cähättän regional’ iq’tisadi integraśiyağa häm töbäktä asqormanıñ üseşenä xosusıy ähämiyät biräbez. Fälästinnän Yämängä, Liviyadan Süriyägä cäyılgän kiñ geografiyada yaqın xezmättäşlek häm koordinaśiya urnaştıruda böten töbägebez cähätennän zur fayda bar,” – dip äytte.

Tön'yaq Kipr Törek Cömhüriyäteneñ xalıqara platformalarda tanıluı mäs’äläsen dä quzğatuçı Şäntop yıllar buyı xaqsız izolyaśiyağa häm êmbargolarğa duçar itelgän Kipr törekläre belän êlemtälärneñ arttırıluınıñ möhimlegenä işarät itte.

Şäntop, Türkiyäneñ terror oyışmaları belän köräşenä dä iğtibarnı yünältep, bigräk tä Süriyä häm Ğıyraqnıñ tön’yağınnan Türkiyägä qarşı höcümnärneñ däwam itüen bilgeläp uzdı.

Törkiyä Böyık Millät Mäclese Başlığı Şäntop: "Ğıyraq häm Süriyäneñ cir bötenlegenä, älbättä, axırğaça xörmät belän qarıybız. Bezneñ berdänber borçıluıbız – bu illärdäge totrıqsızlıq arqasında Türkiyägä yünälgän terror höcümnären totqarlaw häm şulay uq totrıqsızlılıqnı arttırıp Könbatış illäreneñ üz imperialist mänfäğätlären qayğırtıp töbäk illäreneñ çiklären üzgärtü plannarın buldırmaw,” – dip äytte.