Şveśiyä häm Finlyandiyägä qarata höcüm bulsa, NATO cawap biräçäk

NATO ğomum särqatibe 29nçı-30nçı noyabr’dä Rumıniyä başqalası Buxarestta uzaçaq NATO tışqı êşlär ministrları utırışı aldınnan matbuğat cıyılışı uzdırdı

1911236
Şveśiyä häm Finlyandiyägä qarata höcüm bulsa, NATO cawap biräçäk

NATO ğomum särqatibe Yens Stoltenberg Şveśiyä häm Finlyandiyägä qarata höcüm yäisä agressiv mönäsäbät kürelsä, ittifaqnıñ reakśiyä kürsätäçägen belderde. Ul 29nçı-30nçı noyabr’dä Rumıniyä başqalası Buxarestta uzaçaq NATO tışqı êşlär ministrları utırışı aldınnan matbuğat cıyılışı uzdırdı.    

Stoltenberg Şveśiyä häm Finlyandiyäneñ äğ’zalıq ğarizaları belän bäyle ber sorawğa cawap birgändä ike ilneñ möräcäğatennän soñ imzalanğan kerü protokollarınıñ Vengriyä häm Türkiyä tışında 28 äğ’zanıñ parlamentında raslanuın xäterlätte. Ul qalğan ike däwlätneñ dä raslayaçağına ışanuın belderde häm tiz arada tormışqa aşırırğa çaqırdı.   

Stoltenberg bu ay başında İstanbulda ilbaşı Räcäp Tayyip Ärdoğan belän söyläşkän temalar arasında monıñ da buluın äytte. Ul Şveśiyä häm Finlyandiyäneñ iyün’dä Türkiyä belän imzalağan öç’yaqlı memorandum taläplären ütäwen belderde. NATO başlığı citkergänçä, Şveśiyä terrorçılıq belän köräş qanunın üzgärtep tağın da qırıs xälgä kiterde, qoral êksportı çikläwlären beterde, ike ilneñ dä terrorçılıq belän köräştä ozaq waqıtlı xezmättäşlek kileşüe bar.

Stoltenberg ike däwlätneñ NATOğa kerüeneñ ittifaqnı köçäytäçägen assızıqladı häm AQŞ belän Angliyäne dä kertep qayber illärneñ Şveśiyä häm Finlyandiyägä iminlek garantiyäläre täq’dim itüen xäterlätte.     



Bäyläneşle xäbärlär