326 terrorçı täêsirsez xälgä kiterelde

Türkiyä milli saqlanu ministrı Xulusi Akar çik ar’yağındağı terrorçılarğa qarşı Pänçä-Qılıç xäräkäteneñ däwam itüen häm xäzergä qadär 326 terrorçınıñ täêsirsez xälgä kiterelüen belderde. Ul matbuğat oçraşuında jurnalistlarnıñ operaśiyä belän bäyle sorawlarına cawap birde.

“Terrorçılıqnı beterü, ilebez häm millätebez, çiklärebezneñ iminlegen täêmin itü öçen närsä kiräk bulsa, şunı êşlädek häm êşläwne däwam itäbez,”-dip söyläde Akar.  

Ul Pänçä-Qılıç xäräkäteneñ soñğı çordağı iñ zur, külämle häm näticäle hawa höcümnäre belän başlanuın äytte. Xäzerge waqıtta operaśiyä cirdän yärdäm belän däwam itä.

Jurnalistlar Törek qorallı köçläreneñ Süriyäneñ tön’yağında Amerika Quşma Ştatlarınıñ küzätü noqtasına bärüe turındağı süzlärneñ döreslegen soradı. “Bezneñ koaliśiyä köçläre yäisä grajdanlılarğa zarar birüebez mömkin tügel. Bezneñ berdänber maqsatıbız bar, ul da terrorçılar. Terrorçı qayda bulsa, nişanıbız - şunda. Tınıç xalıqqa, tirä-yün’gä zıyan salmaw - bezneñ iñ töp prinśip,”-dip cawap qaytardı Türkiyä milli saqlanu ministrı.

Ber jurnalistnıñ “Süriyädä liderlar däräcäsendä söyläşü qayçan tormışqa aşar?” digän sorawına Akar bolay dide: “Zur häm keçkenä bik küp alğarış bar. Alarnıñ niçek formalaşuı, yomğaqlanuına qarap küz kürer. Waqıyğalarnı yaqınnan qarap barabız”.

Akar Türkiyäneñ ilbaşı Räcäp Tayyip Ärdoğan liderlığında xalıqara mäydanda ähämiyätle urınğa kilüenä basım yasadı. “Här urında ilebez häm millätebezneñ xaq häm xoquqların keşelekle häm şäxes säyäsäte belän yaqlıybız. Monnan tış, Kipr, Azärbaycan häm Liviyä şikelle dus häm qardäş illärneñ ğadel däğ’walarında da alar yanında toruıbıznı däwam itäbez,”-dip söyläde ministr.