Türkiyä belän Kuba xezmättäşlege artaçaq

Türkiyä İlbaşı Räcäp Tayyip Ärdoğan Kuba belän xezmättäşlekne nığıtuda ike yaqlı iradäläreneñ buluın äytte

1910490
Türkiyä belän Kuba xezmättäşlege artaçaq

İlbaşı Ärdoğan Türkiyägä säfär belän kilgän Kuba Däwlät başlığı Miguel Mario Diaz-Canel Bermudezne räsmi tantana belän qarşı aldı.

Soñınnan üzara küreşep söyläşkän Ärdoğan häm Bermudez wäkilleklärara cıyılıştan soñ ike il arasında ireşelgän kileşülärgä imza salu tantanasında qatnaştı.

Annan soñ oyıştırılğan urtaq matbuğat oçraşuında Bermudez belän söyläşüläre waqıtında Türkiyä-Kuba mönäsäbätlären böten yaqları belän qarap çığuların belderüçe Ärdoğan: "Xezmättäşlegebezne nığıtu yünäleşendä köçle häm ike yaqlı iradägä iyä buluıbıznı kürü bezne ayıruça qanäğät itte. Mönäsäbätlärebezneñ çın potenśialdan tübän buluında Kubağa qarşı yıllar buyı qullanılğan ber yaqlı sankśiyälärneñ yoğıntısınıñ buluı mäğ’lüm”, - dip äytte.

Ärdoğan, Bermudez belän Türkiyä-Kuba säwdä külämen 200 million dollarğa citkerü täwäkkällegen raslawların belderep:

"Bu qısada iñ êlek ênergetika, turizm, tözeleş, awıl xucalığı, üseş, sälamätlek saqlaw häm êkologiya kebek ölkälärdä xäzerge xezmättäşlekne üsterü mömkinleklären bäyälädek. Çikläwlär arqasındağı awırlıqlarğa qaramastan firmalarıbıznıñ Kubağa bulğan iğ’tibarınıñ artuın küräbez”, - dip äytte.

Qunaq Däwlät başlığı Bermudez isä çığışında: "Säwdä, finans êlemtälärebezne häm ike il arasındağı xezmättäşlekne tağın da törleländerü mäs’äläsendä kileştek”, - dide.

Bermudez İlbaşı Ärdoğanğa ike yaqnıñ urtaq mänfäğätenä turı kiläçäk itep biotexnologiya, yañartıla alınğan ênergiya, turizm, igençelek, terlekçelek, sälamätlek saqlaw, mäğarif häm mädäniyät ölkälärendä êşçänlekne däwam itterü yöklämälären citkerülären iskärtep uzdı.

İlbaşı Ärdoğan annan soñ Kuba Däwlät başlığı Bermudez xörmätenä räsmi kiçke aş mäclesen oyıştırdı.



Bäyläneşle xäbärlär