Ärdoğan: “Aşlıq koridorınıñ waqıtı ozaytıldı”
Türkiyä İlbaşı Räcäp Tayyip Ärdoğan Qara diñgez aşlıq koridorı kileşüeneñ 2022nçe yılnıñ 19nçı noyabrennän başlap 120 köngä ozaytıluın belderde
İlbaşı Ärdoğan sośial’ media akkauntınnan yasağan belderüendä Qara diñgez aşlıq koridorı kileşüe möddäteneñ ozınaytıluın citkerde.
Ärdoğan belderüendä:
“Türkiyäneñ qabul itüendä uzdırılğan dürt yaqlı söyläşülär näticäsendä Türkiyä, Berläşkän Millätlär Oyışması, Rusiyä Federaśiyäse häm Ukraina arasında qabul itelgän qarar nigezendä Qara diñgez aşlıq koridorı kileşüe 2022nçe yılnıñ 19nçı noyabrennän başlap 120 köngä ozaytıldı.
Soñğı 4 ay êçendä 500gä yaqın köymä belän 11 million tonnadan kübräk aşlıq häm azıq-tölek produktlarınıñ moxtaclarğa citkerelüe belän bu kileşüneñ dönyanıñ azıq-tölek täêmin itelüe häm qurqınıçsızlığı öçen ni qadär möhim häm faydalı buluı açıq räweştä kürende.
Kileşüneñ ozaytıluı iradäsen beldergän Berläşkän Millätlär Oyışmasına, Ğomum särkätip (Antonio) Guterreşkä, Rusiyä İlbaşı (Vladimir) Putinğa häm Ukraina Däwlät başlığı (Volodimir) Zelenskiygä räxmätläremne citkeräm, öleş kertkän härkemne täbrik itäm. Xäyerle uñışlı bulsın”, - dip äytte.
BMO Ğomum başlığı Guterreş tä sośial’ media akkauntınnan urtaqlaşqan yazmasında: "Qara diñgez aşlıq iniśiativasınıñ däwam itterelüenä qağılışlı kileşüne qanäğät bulıp qarşılıym”, - dip äytte.
Awrupa Berlege komissiyası başlığı Ursula von der Leyen dä “Twitter” akkauntınnan yasağan belderüendä, Qara diñgez aşlıq kereşüeneñ däwam itterelüe turındağı kileşüne qanäğätlelek belän qarşılawın citkerep, BMO Ğomum särkätibe Antonio Guterreş belän Türkiyä İlbaşı Ärdoğannı täbrik itte.
Qara diñgezdän qurqınıçsız azıq-tölek cibärelüeneñ täêmin itelüe öçen 22nçe iyül’dä İstanbulda İlbaşı Ärdoğan häm BMO Ğomum särkätibe Guterreş aldında Ukraina häm Rusiyä belän İstanbul aşlıq kileşüenä qul quyılğan ide.
