Ärdoğan: “Aşlıq cibärelüe krizisı xäl itelde”
Türkiyä İlbaşı Räcäp Tayyip Ärdoğan aşlıq cibärelüe krizisınıñ xäl itelüen, cibärüneñ moña qadär planlaştırılğanı kebek däwam itäçägen belderde
İlbaşı häm “Ğadälät wä qalqınu” partiyası (“Aq” partiya) ğomum başlığı Ärdoğan partiyasınıñ Törkiyä Böyık Millät Mäclesendäge törkem cıyılışında çığış yasadı.
Ärdoğan Rusiyäneñ Ukraina portlarınnan igençelek êşlänmäläreneñ çığuına qağılışlı kileşülärneñ ütälüenä qatnaşuın tuñdıruın bäyäläde.
Aşlıq koridorı belän bäyle bularaq kiçä Rusiyä İlbaşı Vladimir Putin belän söyläşüen, bügen dä Ukraina Däwlät başlığı Volodimir Zelenskiy belän söyläşäçägen belderüçe İlbaşı Ärdoğan aşlıq koridorınıñ moña qadär bulğanı kebek yañadan açıluın da açıqladı.
Ärdoğan Rusiyä saqlanu ministrı Sergey Şoygunıñ, Türkiyä Milli saqlanu ministrı Hulusi Akarğa şaltıratıp, bügen aşlıq cibärelüeneñ moña qadär bulğanı kebek däwam itäçägen citkerüen belderde.
Rusiyä saqlanu ministrlığı 29nçı üktäbr’dä Ukrainanıñ annekśiyälängän Qırımdağı Sivastopol şähärendä urnaşqan Rusiyä xärbi häm grajdan qorablarına höcüm oyıştıruın beldergän ide.
Ministrlıq belderüendä Kievneñ "İngliz belgeçläreneñ qatnaşuı belän Qara diñgez flotı köymälärenä häm aşlıq koridorınıñ iminlegen täêmin itüdä qatnaşuçı grajdan köymälärgä qarşı terror ğamälen yasawı” äytelgän ide.
Belderüdä: “Terror ğamälen küz aldında totıp, Rusiyä tarafı Ukraina portlarınnan igençelek êşlänmäläreneñ çığuına qağılışlı kileşülärneñ ütälüendä qatnaşunı tuñdırdı”, - dip citkerelgän ide.
