Türkiyä tırışlığı belän Ukraina häm Rusiyä äsir almaştı

Ärdoğan Türkiyä aradaşçılığı yärdämendä bügen äsir almaşu buluın citkerde

1883038
Türkiyä tırışlığı belän Ukraina häm Rusiyä äsir almaştı

Türkiyä ilbaşı Räcäp Tayyip Ärdoğannıñ Rusiyä däwlät başlığı Vladimir Putin häm Ukraina liderı Volodimir Zelenskiy belän alıp barğan diplomatiya êşçänlege näticäsendä ike il arasında 200 suğış äsiren almaşu buldı.

Ärdoğan N’yu-Yorktağı Törek yortında jurnalistlarğa AQŞqa säfäre xaqında söyläde. Şunda ul Türkiyä aradaşçılığı yärdämendä bügen bulğan äsir almaşu turında da äytte. Ärdoğan fikerençä, älege adım 24nçe fevral’dä başlanğan suğışnı beterü yulında ähämiyätle. Ul tınıçlıq urnaştıru tırışlıqlarınıñ däwam itüen äytte.

Ärdoğan äsirlärne almaşuğa mömkinlek birgän öçen Putin belän Zelenskiyğa räxmät äytte. “Bu prośessta tırışlıq kürsätkän barlıq duslarğa da räxmätemne belderäm,”-dide ul.

Ukraina däwlät başlığı Volodimir Zelenskiy isä Türkiyäneñ aradaşçılığı yärdämendä ilenä qaytqan 215 ukrainalı öçen Ärdoğanğa räxmät äytte. Ul almaşu êşçänlege näticäsendä tapşırılğan Azov batal’yonı komandirları belän videoêlemtä aşa söyläşte. Zelenskiy alarnı Rusiyädäge äsirlektän qotıluları belän qotladı. Qaytuçılar arasında ülem cäzasına xökem itelüçelär dä bulğan.

Almaşu yulı belän kire alınğan 5 xärbi iminlek maqsatlarınnan Türkiyägä cibärelgän. “İlbaşı Ärdoğan belän söyläştem. Azovnıñ 5 komandirı Ärdoğannıñ maxsus kontrolendä Türkiyädä imin urında totılaçaq. Tağın ber tapqır ilbaşı Ärdoğanğa räxmätemne belderäm,”-dide Zelenskiy. Ul Rusiyägä 55 xärbi äsirne tapşıruların da äytte.

Şul uq waqıtta, AQŞ milli iminlek kiñäşçese Djeyk Sallivan Ukraina häm Rusiyä arasında xärbi äsir almaşudağı aradaşçılığı öçen Türkiyägä räxmäten citkerde. Twitter akkauntında ul bolay dip yazdı: “Aşlıq kileşüendäge liderlıqtan tış, Ukraina häm Rusiyä arasındağı äsir almaşuda aradaşçı buluı öçen Türkiyä xökümätenä räxmät”.



Bäyläneşle xäbärlär