"Törkiyäneñ argumentlarına citdi qaraw kiräk"

Germaniyä saqlanu ministrı Kristin Lambrext Finlyandiyä häm Şveśiyäneñ bulaçaq NATO äğ’zalığı mäs’äläsendä Törkiyäneñ borçuları häm argumentlarınıñ citdi qabul itelüeneñ ähämiyätle ikänen äytte. Ul Bel’giyä başqalası Brüssel’dä Awrupa Berlege saqlanu ministrları cıyılışı qısalarında jurnalistlarğa belderü yasadı.

Lambrext Finlyandiyä häm Şveśiyäneñ NATOğa kerergä tırışuına söyenüen belderep, monıñ bu ike däwlät öçen dä, ittifaq’ öçen dä yaxşı bulaçaqğın assızıqladı. Anıñça, älege illär NATOnıñ qıymmäten arttıraçaq.

“Finlyandiyä häm Şveśiyäneñ NATOğa kerüe belän bäyle barlıq qararlar bertawıştan birelergä tiyeş. Şul säbäple Törkiyä belän bik tığız räweştä söyläşü alıp barırğa häm äytelgän borçuları belän argumentlarına citdi qararğa kiräk,”-dide Germaniyä ministrı.

Lambrext Finlyandiyä belän Şveśiyäneñ NATOğa kergännän soñ iminlege köçäyäçägenä häm monıñ alğı planda bulırğa tiyeşlegenä basım yasıy. Ul älege illärneñ ittifaq’qa quşıluın yaqlawın da citkerde.  

“Bezneñ yaxşı argumentlarıbız bar. Bu barı Finlyandiyä belän Şveśiyäneñ genä tügel, NATOnıñ da faydasına bulaçaq,”- di Lambrext.

Törkiyä ilbaşı Räcäp Tayyip Ärdoğan Şveśiyä belän Finlyandiyäne “terrorçı oyası” dip atadı häm alarnıñ ittifaq’qa quşılularına qarata üz fikeren äytte: “Barınnan da bigräk, Törkiyägä sankśiyälär kertüçelärneñ bu prośess êçendä iminlek oyışması NATOğa quşılularına rizalıq birmäyäçäkbez”.