Törkiyä belän Greśiyä arası qabat kiyerenke
Greśiyä tışqı êşlär ministrı Nikos Dendiasnıñ Törkiyä belän bäyle belderüläre rizasızlıq uyattı
Törkiyä Greśiyäne xalıqara xoquqnı häm kileşülärne xörmät itärgä çaqırdı. Tışqı êşlär ministrlığı süzçese Tanju Bilgiç Greśiyä tışqı êşlär ministrı Nikos Dendiasnıñ Törkiyä belän bäyle belderülären “provokaśion söyläm” bularaq bäyäläde. “İlebezneñ üz xoquq häm mänfäğat’lären saqlaw öçen tırışuın Greśiyäneñ yanaw bularaq kürsätüenä, bu yünäleştä çınbarlıqqa turı kilmägän êşçänlegenä qarşı çığabız,”-di ul. Tanju Bilgiç äytüençä, regionda yanaw bulsa da, ul -Greśiyäneñ kiyerenkelekne arttıruçı ber’yaqlı ğamälläre.
“Greśiyä tışqı êşlär ministrı Dendiasnıñ här kön diyärlek yasıy torğan Törkiyägä qarşı bäyannarı tınıçlıq häm totrıqlılıqqa xezmät itmäwçe häm çınbarlıqtan yıraq, popülist farazlar. Bu provokaśion söylämnär äybät kürşe mönäsäbätlärenä dä, Greśiyä belän qabat başlanğan konsul’tativ söyläşülärneñ ruxına da turı kilmi,”-dide Törkiyä wäkile.
Dendias kiçä Soğud Ğaräbstanı tışqı êşlär ministrı Faysal bin Färxan Äl Soğud belän Afinada matbuğat cıyılışı ütkärde. Ul üz çığışında Törkiyäneñ, xalıqara kileşülär nigezendä, Êgey diñgezendäge utrawlarnıñ qorallandırılmasqa tiyeşlege belän bäyle belderülärenä rizasızlıq kürsätte häm ilne regionda agressiv säyäsät alıp baruda ğayepläde.
