AQŞ belän Rusiyägä kisätü

Törkiyä xökümäte räise Binali Yıldırım Süriyä mäs’äläsendä äytkäläşüçe AQŞ belän Rusiyägä kisätü yasadı. “Uram ğawğasın tuqtatırğa waqıt, annan ğayepsezlär zarar kürä”,-di ul. Binali Yıldırım İstanbulda Awraziya İq’tisad sammitında çığış yasadı. Xökümät räise BMO daimi wäkilläreneñ bu könnärdä zur cawaplılıq astında buluların assızıqladı.

“Närsä êşlilär? Twitterdan ber-bersenä yanıylar. Dön’ya sezneñ süz köräşterüegez näticäsendä millionnarça keşeneñ yuqqa çığuın qarap toraçaqmı? Yänäse, “Minem tağın da äybät raketam bar”. “Yuq,-di ikençese,-mineke äybäträk!”, “Cibär alaysa! Cibärmäsäñ fälän bulır!” Uram ğawğası. Uram xuligannarı şikelle tartqalaşalar. Ämma, näticädä, awırlığı kem başına töşä? Ğadi xalıqnıqına”, - dip söyläde Binali Yıldırım. Ul Süriyädäge aktyorlarnıñ töbäkne tağın da butalçıq xälgä kiteräçägenä borçıla. “Xäzer köndäşlek waqıtı tügel. Töbäktä yaralarnı bäyläw waqıtı citte”, di xökümät räise. Binali Yıldırım, Süriyäneñ dä, Ğıyraqnıñ da cir bötenlegen saqlap häm ikele standartlarnı ğamälgä kertmiçä, bergäläp terrorçılıq belän köräşergä kiräklegen belderä.