Cumalıkızık awılı

Bügenge yazmabızda Törkiyäneñ Märmär töbägendä urnaşqan,original’ tarixi strukturasın bügenge köngä qadär saqlap qalğan, üzençälekle öyläre häm uramnarı belän  iğ’tibarnı cälep itüçe Cumalıkızık awılı turında süz alıp barabız. Ğosmanlı imperatorlığı çorında Anadoluda awıl tormışı niçek bulğan digän sorawğa cawap êzläwçelärne kötep qala Cumalıkızık.

Cumalıkızık awılı Bursada urnaşqan. Ul 2014 nçe yılda Bursa belän bergä YUNESKOnıñ Bötendönya mirası isemlegenä kertelä. Bu töbäk Ğosmanlı imperatorlığınıñ qorıluına şahit bulu cähätennän zur ähämiyätkä iyä.

 “Bursa häm Cumalıkızık:Ğosmanlı imperatorlığınıñ tuuı” isemle Bötendönya mirası mäydanı Bursa şähärendäge 6 äsärne üz êçenä ala. Alar: Orhangazi kölliyäse häm anıñ tirä yğındağı yulawçılar yortları cirlege, Hüdavendigar kölliyäse, Yıldırım kölliyäse, Yäşel kölliyä, Muradiyä kölliyäse häm Cumalıkızık awılı.

Ğosmanlı imperatorlığınıñ berençe başqalası bulğan Bursa 14 nçe ğasırdan başlap sośial’, mädäni häm säwdä cähätennän alğa kitä. Ğosmanlı däwerendä şähärdä distälärçä mäçet, mädräsä, törbä,munça, yulawçılar yortı,xastaxanä salına, xäyriyä cämğiyäte, bazar buldırıla. Bursanıñ şähär modele soñraq barlıqqa kilgän Ğosmanlı-törek şähärlärenä ürnäk bula.

Bursanıñ Bötendönya mirası isemlegenä kerüenä êtärgeç birgän bik bay tarixı strukturası ber Anadolu däwläteneñ dönya imperatorlığına qadärge barışın bik açık çağıldıra.

Ğosmanlı imperatorlığınıñ yaqınça 700 yıllıq däwerendä tözelgän binalar biregä kilüçelärne tarixnı küz aldına kiterergä yärdäm itä.   

Bursa şähär üzägenä 13 çaqrım yıraqlıqta ,Uludağ( Olı taw) itäklärendä urnaşqan Cumalıkızık awılı tarixi strukturasın da, tradiśion yäşäw räweşen dä bügenge köngä qadär saqlap qalğan. Başlanğıç däwerdäge Ğosmanlı arxitekturasın çağıldıruçı üzençälekle öyläre, yañğırlı könnärdä sunıñ ağıp kitüe öçen urtası kanal itep yasalğan taş tüşälgän uramnarı häm iskitkeç binaları belän äyterseñlä muzey kebek Cumalıkızık. Kirpeçtän êşlängän öyläre, tösle –tösle divarları ,uram çişmäläre belän sezne sixri ütkännärgä alıp kerep kitä awıl.  

Cumalıkızık awılına  här yıl meñnärçä turist kilsä dä biredä igençelek däwam itä.Cirle xalıq awıl urtasındağı mäydanda üz êşlänmälären sata.

Bu yaqlarğa yulığız töşä ikän iskitärlek tabiğate belän iğ’tibarnı cälep itüçe Uludağnı (Olı tawnı) barıp qararğa kiñäş itäbez, şifalı termal sulardan faydalanırğa, Bursa yefäge satıp alırğa, tanılğan cirle rizıqlardan İskändär kebabı, Kämalpaşa häm kaştan täm-tomnarın da tatıp qararğa onıtmağız.