AQŞtan Törkiyägä räxmät belderdelär

AQŞ däwlät särqatibe Êntoni Blinken häm älege ilneñ BMOdağı daimi wäkile Linda Tomas Grinfild Ukraina aşlığın Qara diñgezdän dön’ya bazarına çığaru êşendäge tırışlıqları öçen Törkiyägä räxmät äytte.  

Ukrainanıñ Odessa portınnan quzğalğan häm İstanbul buğazında tuqtalğan 27 meñ tonna kukuruz taşuçı yök korabı Razoni kiçä, Urtaq koordinaśiyä üzäge törkemeneñ kontrolennän soñ, Livanğa taba xäräkät itte.

Blinken sośial’ media aşa älege waqıyğa belän bäyle belderü yasadı.

“Ukrainadan quzğalğan häm Qara diñgezne imin räweştä uzğan berençe aşlıq korabı öçen qanäğat’lek xis itäbez. BMO häm Törkiyäneñ, krizisnı çişü qısalarında, aşlıqnı ixtiyacı bulğan töbäklärgä ireşterü tırışlıqları öçen räxmät belderäbez” diyelä anda.

Linda Tomas Grinfild isä Amerikanıñ CNN kanalına interv’yusında: “BMO ğomum särqatibe Antonio Guterriş häm Törkiyä xökümätenä bu iniśiativanıñ alğa baruına kertkän öleşläre öçen räxmät belderergä telim,”-dide.  

Qara diñgez aşa aşlıqlarnı isän-imin çığaru öçen tözelgän Konsul’tativ koordinaśiyä üzäge 27nçe iyül’dä İstanbuldağı Milli saqlanu universitetı kampusında êşli başladı. Anda wazıyfa başqaruçı Rusiyä, Ukraina, Törkiyä häm BMO wäkilläreneñ kontrolennän soñ Razoni korabı kiçä Märmär diñgezenä uzdı.