Odessadan quzğalğan korabnı İstanbulda tikşerdelär

Ukrainanıñ Odessa portınnan quzğalğan kukuruz taşuçı yök korabı “Razoni”nı İstanbulda kontrol’ itü êşçänlege tögällände.

Bilgele bulğança, global’ aşlıq krizisın kirtäläw maqsatınnan 22nçe iyül’dä Törkiyä, Rusiyä, Ukraina häm BMO arasında “Aşlıq häm azıq-tölek matdäläreneñ Ukraina portlarınnan imin räweştä çığarıluı” turında kileşü imzalandı. Anıñ qısalarında Odessa portınnan yulğa çıqqan yök korabı kiçä tönge säğat’lärdä İstanbulğa kilep citep yakor’ attı. “Razoni”nı Törkiyä, Rusiyä, Ukraina häm BMO wäkillärennän toruçı delegaśiyä kontrol’ itte.

Milli saqlanu ministrlığınıñ sośial’ media akkauntınnan yasalğan belderüdä bolay diyelä: “Urtaq inspekśiyä törkeme “Razoni” köymäsendäge tikşerüne tögälläde. 27 meñ tonna kukuruz taşuçı korab tizdän Livanğa baru öçen İstanbul buğazınnan kiçäçäk”.

Yaqınça säğat’ yarım barğan tikşerü êşennän soñ törkem korabtan töşte.

Ukraina portlarınnan täwge yökne alıp yulğa çıqqan “Razoni”dan soñ başqa korablarnıñ da, bilgelängän koridor häm şartlar qısalarında, aşlıq taşıyacağı planlaştırıla.