Küptän kötelgän kileşü imzalandı

İstanbulda Törkiyä ilbaşı Räcäp Tayyip Ärdoğan, Ukraina häm Rusiyä wäkilläre, BMO ğomum särqatibe Antonio Guterriş qatnaşında Ukrraina portlarında qalğan aşlıqnı çığaru öçen tözelgän kileşü imzalandı.

“Böten dön’yanı ozaq waqıt mäşgul’ itkän global’ azıq-tölek krizisınıñ çişeleşendä zur rol’ uynawçı ber iniśiativağa säbäpçe buluıbız öçen ğorurlanabız,”-dide Ärdoğan häm bolay dip däwam itte: “Kiläse könnärdä başlanaçaq korab säfärläre belän Qara diñgezdän dön’yanıñ bik küp ilenä yaña sulış ütkärgeçe açqan bulaçaqbız”.

İlbaşı korablarnıñ quzğaluınnan başlap imin räweştä tapşıru häm barası portqa citüenä qadär barlıq prośesslarda konsensusqa ireşülären belderde. “Bu bik ähämiyätle plannı tormışqa aşıru häm kontrol’ itü İstanbulda tözeläçäk urtaq koordinaśiyä üzäge tarafınnan başqarılaçaq,”-dide Ärdoğan.

BMO ğomum särqatibe Antonio Guterriş isä üzeneñ çığışında bolay dide: “Dön’ya moña härwaqıttağıdan kübräk moxtac. Törkiyä cömhüriyäte, xörmätle ilbaşı Räcäp Tayyip Ärdoğan, bu prośessnıñ här êtabı sezneñ qatğıy poziśiyägez arqasında tormışqa aştı. Bu kileşü, çınlıqta, böten dön’ya öçen imzalana”.