Xadisä BMOnıñ süzçese buldı

Tanılğan törek cırçısı Xadisä BMO balalarğa yärdäm fondınıñ (UNICEF) Törkiyä balalarnı saqlaw programmalarınıñ süzçese itep bilgelände. İstanbulda uzğan çarada UNİCEF Törkiyä wäkile Regina De Dominikis Xadisäne qotladı häm bar keşene oyışma êşçänlegendä qatnaşırğa çaqırdı. Ul balalarnıñ xoquqların saqlawda urtaq tırışlıq kürsätelergä tiyeşlegen assızıqladı.

“Balalarğa imin räweştä üsäçäk häm mömkinleklären tormışqa aşıraçaq moxit kiräk. Bu qurqınıçsız moxitne buldıru öçen härkemneñ urtaq tırışlığına ixtiyacıbız bar,”-dip söyläde Regina De Dominikis.

Ul dön’ya külämendä millionlağan balanıñ törle awırlıqlar belän oçraşuın häm xälne çişü öçen êşçänleklärneñ däwam itüen äytte. Dominikis 456 millionnan artıq sabıynıñ qaynar noqtalarda yäşäwen, 160 millionnan artığınıñ êşçe buluın assızıqladı. Belgeç balalarnı suğışçı bularaq qullanu, censi qıyırsıtu şikelle cinayät’lärgä qarşı köräşüneñ mäcbüri ikänen dä iskä töşerde. 

Cırçı Xadisä isä UNICEFqa häm Törkiyädäge barlıq balalarğa bulışuı belän ğorurlanuın söyläde. Ul sabıylarnıñ tormışların häm kiläçäklären qurqınıç astına quyuçı barlıq mäs’älälärgä iğ’tibar itäçägen äytte.