"Şveśiyä häm Finlyandiyäneñ NATOğa kerüe üzlärennän tora"

Törkiyä tışqı êşlär ministrı Mäwlet Çavuşoğlu Şveśiyä häm Finlyandiyäneñ NATOğa kerü öçen Törkiyägä cibärgän dokumentlarınıñ üzläre kötkänne qanäğat’länderüdän bil yıraq buluın, monı älege däwlätlärgä dä, ittifaq’qa da citkerülären äytte. Ul Norvegiyä tışqı êşlär ministrı Anniken Xyuitfel’dt, İrlandiyä tışqı êşlär häm saqlanu ministrı Saymon Koveni belän oçraşudan soñ bulğan urtaq matbuğat cıyılşında çığış yasadı.  

Çavuşoğlu Şveśiyä häm Finlyandiyäneñ NATO äğ’zalıqlarına qayçanğa qadär qarşı çığaçaqları turındağı sorawğa monıñ älege ike ilneñ Törkiyägä biräçäk cawabı belän bäyle buluın äytte. Ul üzläreneñ teläklären häm borçuların NATOğa da, Şveśiyä belän Finlyandiyägä dä tögäl itep yazmaça citkerülären assızıqladı.

Çavuşoğlu Törkiyäneñ NATOdağı açıq işek säyäsäten iñ köçle räweştä yaqlawçı däwlätlärdän buluın da äytep uzdı. “Xäzer älege il bezneñ taläplärgä niçek cawap biräçäk, qayçan cawap biräçäk, bu mäs’älädä ber kileşügä barırğa kiräk,”-dide ul.

Çavuşoğlu söylägänçä, NATO Törkiyägä kileşü dokumentı cibärgän, Şveśiyä xökümäte räise Magdalena Anderssonnıñ kiñäşçese dä Änkarağa dokument yullağan. Tik alar Törkiyä kötkänçä tügel.

“Ägär söyläşü şartları buldırılsa, bez cibärgän dokumentlarğa nigezlänergä tiyeş,”-di ministr.