Akar saqlanu ministrları cıyılışın bäyäläde

Törkiyä Milli saqlanu ministrı Hulusi Akar Rusiyä belän Ukraina arasındağı suğış (24nçe fevral’dä) başlanğannan birle Törkiyäneň Montrö qısalarında Bosfor buğazınnan bernindi räweştä xärbi köymäneň uza almayaçağın böten taraflarğa citkerüen xäterlätep: "Xäzergä qadär dä buğazdan bernindi kiçü bulmadı”, - dip äytte.

Akar Amerika Quşma Ştatlarınıň Germaniyadağı Ramstein NATO hawa saqlanu bazasında oyıştırılğan “Ukrainağa qarata saqlanu häm iminlek konsultaśiya törkeme cıyılışı”nnan soň bäyäläwlär yasadı.

Ukraina saqlanu häm iminlek kiňäşmäse cıyılışın 40tan artıq il wäkile belän ütkärülären belderüçe Akar Ukraina saqlanu ministrı Oleksii Reznikov belän bergä qayber räsmi zatlar belän fiker alışuların iskärtep uzdı.

Ukrainadağı xällärne yaqınnan küzätep baruların citkerüçe Akar: "Saqlıq belän, ipläp diplomatiya yulın açuıbız kiräk. Bu räweşle tağın da ciňel kileşü yaqlı çişeleşlär tabıla alınaçağın uylıybız”, - dip äytte.

Akar cıyılışta Törkiyäneň waqıyğalarğa qaraş totışın tağın ber qat citkerü forsatın tabuların belderep: "İlbaşıbız Räcäp Tayyip Ärdoğannıň berniçä tapqır Rusiyä İlbaşı Vladimir Putin häm Ukraina Däwlät başlığı Volodimir Zelenskiy belän ütkärgän söyläşüläre bar. Bu söyläşülärdä xörmätle İlbaşıbız utnı tuqtatunıň tiz arada täêmin itelüe öçen östälgä utırıluı öçen tırışlıq kürsätä”, - dip äytte.

Qayber qıyınlıqlarnıň buluına qaramastan ömetle buluların citkerüçe Akar: “Aldıbızdağı könnärdä xörmätle İlbaşıbıznıň täq’dimnäre belän, bälki, ike lidernıň oçraşuı mömkin bulaçaq. Naçaraya barğan humanitar wazğıyätneň tağın da kübräk naçaraymawı öçen aradaşçılıq belän bergä Törkiyä bularaq zarur bulğan öleş kertüebezne däwam itäbez”, - dide.