Törkiyädä sälamätlek turizmı

Angliyädä yäşäwçe Fiona Bruks 40 kiloğa yabığa häm üzen yañadan tuğan şikelle xis itä. Ğomereneñ küp öleşen artıq kiloları belän köräşep ütkärgän xanımğa Angliyäneñ Milli sälamätlek xezmäte qısalarında aşqazanın keçeräytü operaśiyäse öçen 4 yıl çirat kötärgä kiräklege äytelgän. Fiona isä aylar buyı tikşergännän soñ tormışın qotqarırday operaśiyäne yasatu öçen Törkiyägä kilä.

Fiona Bruks - sälamätlek turistı:

-Törkiyädä barısı da tağın da tizräk. Östäwenä, Angliyädäge şäxsi sälamätlek xezmätläre mondıy uq däräcädä tügel. Törkiyädäge xirurglarnıñ awırularğa tağın da kübräk qayğırtu häm iğ'tibar kürsätüen uylıym. Sezgä şäxes bularaq qarıylar, barı işektän kergän häm kvotaların tutırıp däwalanu öçen aqça tülägän beräw bularaq qına kürmilär.

Fiona bu sawlıq xezmäten Angliyädä alsa, berniçä operaśiyä öçen 65 meñ dollar tülärgä mäcbür bulaçaq ide. Törkiyädä isä alar 15 meñ dollarğa töşte. Aña Angliyädä äytelgän summanıñ çiregennän beraz azrağı. Fiona Törkiyägä kilep üze teläp operaśiyä yasatuçı meñnärçä inglizneñ berse. 2021nçe yılda 1 million 700 meñ çit il xastası sälamätlek turizmı öçen Törkiyägä kilde.

Nixai Tärzi - "The Health Store Turkey" şirkäten tözüçe:

-Çit ildä üzeñ teläp operaśiyä yasatunıñ iñ zut êtärgeç köçe - bu xezmätlärneñ oçsız häm uñaylı buluı. Biredä çirat isemlege häm kötü waqıtı bulmağan iskitkeç xastaxanälärebez bar. Misalğa, xäzer Angliyädä botqa operaśiyä öçen 18 aydan 3 yılğa qadär kötep torırğa kiräk. Törkiyädä isä sez irtägä ük tabibta kürenep ber aydan yaña botığız belän yöri alasız. Törkiyädä täq'dim itelüçe operaśiyälär teş däwalaw, lazer belän küzgä operaśiyä, bot häm tez protezı, êko yärdämendä balağa uzu häm çäç utırtudan tora.

Angliyä milli sälamätlek xezmäte däwalanu öçen kötüçe küp sandağı awırunıñ yöge astında izelä. Kovid-19 pandemiyäse sistemanı tağın da kiyergäç, teläkkä bäyle operaśiyälärneñ kötü waqıtı rekord däräcägä citä. Törkiyädä täq’dim itelüçe xezmätlär Angliyäneñ sälamätlek saqlaw tarmağın ayaqqa bastırunıñ ber yulı bulırğa mömkin. Şuña kürä Angliyädäge sälamätlek saqlaw tarmağı wäqalätleläre üsep kilüçe bu alannı kiñäytü maqsatınnan Törkiyä belän söyläşülär alıp bara.