Ärdoğan: "(Rusiyä-Ukraina) İkesennän dä waz kiçüebez mömkin tügel”

İlbaşı Ärdoğan Afrika säfärennän qaytqan çaqta oçqıçta könüzäk mäs’älälärgä qağılışlı bäyäläwlär yasadı, jurnalistlarnıñ sorawlarına cawap birde.

Ärdoğan, 20nçe fevral’ yäkşämbe könne Kongo Demokratik Cömhüriyäte belän başlanğan Afrika säfären tögälläwın belderep, Ukrainada yäşängän kritik xällär arqasında Gvineya-Bisau vizitın kiçekterep torırğa mäcbür buluların citkerde.

Ärdoğan: “İlebezneñ Ukrainanıñ cir bötenlegenä birgän ähämiyätne telefonnan söyläşkän xörmätle Zelenskiyğa dä citkerdem. Minsk kileşülären bozğan hiçber kereşüne qabul itmäwebezne, itmäyäçägebezne dä iskärtep uzdım. Krizisnıñ artıq zuraymıyça diplomatiya häm dialog yulı belän xäl itelüe öçen üz burıçıbıznı ütärgä äzer buluıbıznı äyttem”, - dide.

Qara diñgezneñ iminlegenä häm totrıqlılığına yanawçı xäzerge wazğıyätne aldıbızdağı könnärdä NATO berlektäşläre belän dä kiñäşläşäçäklären, NATO liderlar sammitın video konferenśiya ısulı belän uzdıraçaqların belderüçe Ärdoğan: “Telägebez – Qara diñgezdän kürşebez Rusiyä häm Ukrainanıñ tiz arada söyläşülär östälenä qaytuı”, - dip basım yasadı.

İlbaşı Ärdoğan NATO sammitınnan kötkännäre turındağı sorawğa, xäzerge waqıtta Rusiyä belän liderlar qısalarında älegä citdi söyläşü säläten kürsätüçeneñ bulmawın belderep: "Xäzergä qadär Ukrainağa citdi mäğ’nädä ğaskäri cibärü kebek wazğıyät aldında älegä qalmadıq. Härkem barı tik süz söyli, êş başqaruçı yuq. Şuşındıy torış bar. Şuña kürä Rusiyä inde çik buyında citdi dip äytelä alınaçaq külämdä xärbi köçen cıydı. Älbättä, mondıy küreneş aldında närsä bula alaçağın farazlaw öçen küräzäçe bulırğa kiräkmi. Bu cähättän bez ütkäräçäk şuşı video konferenśiyädä NATO berlektäşe äğ’za illärneñ liderları närsä äytäçäk, qararbız. Bez dä, älbättä, äytäçäklärebezne alarnıñ äytäçäklärenä qarap bilgelärbez, totışıbıznı citkererbez”, - dip äytte.

Ukraina häm Rusiyä arasındağı kiyerenkelek küz aldında totılıp, Törkiyäneñ şuşı ike il arasındağı anıq totışınıñ kem yaqlı bulaçağı turındağı soraw uñayınnan Ärdoğan: "İkesennän dä waz kiçüebez mömkin tügel”, - dip belderde.