İlbaşı Ärdoğannıñ Qazaqstan diplomatiyası

İlbaşı idaräseneñ êlemtä räislegennän yasalğan belderügä kürä, İlbaşı Ärdoğan Qazaqstan Däwlät başlığı Qasım Cömärt Toqayev belän ber rättän Azärbaycan İlbaşı İlham Aliyev, Qırğızstan Däwlät başlığı Sadır Caparov häm Üzbäkstan İlbaşı Şäwkät Mirziyayev belän ütkärgän telefon söyläşülärendä Qazaqstandağı soñğı täräqqıyätlär turında fiker alıştı.

Ärdoğan, Qazaqstan İlbaşı Toqayev belän ütkärgän söyläşü waqıtında dus häm qardäş Qazaqstanda yäşängän täräqqıyätlärne yaqınnan küzätep baruların belderep, waqıyğalarda häläq buluçılarğa Allahtan yarlıqaw, yaralanuçılarğa şifa teläde.

Törkiyäneñ Qazaqstan belän teläktäşlek êçendä buluın iskärtep uzuçı Ärdoğan Törki däwlätlär oyışmasınıñ da yasağan belderüendä Qazaqstanğa yaqlawın citkerüen belderde.

Qazaqstanda yaña xökümätneñ tiz arada tözelüen häm kiyerenkelekneñ qısqa waqıtta betüen teläwen äytüçe Ärdoğan Qazaqstan xalqınıñ ike yaqlı ışanıç häm dialog qısalarında problemalarnı xäl itäçägenä ışanuına basım yasadı.

Ärdoğan kiräk bulğan oçraqta Törkiyäneñ härtörle texnik mäğ’lümat häm täcribä belän urtaqlaşırğa äzer buluın iskärtep uzdı.

Ärdoğan Azärbaycan İlbaşı Aliyev, Qırğızstan Däwlät başlığı Caparov häm Üzbäkstan İlbaşı Mirziyayev belän söyläşülärendä dä, Qazaqstan totrıqlılığınıñ häm iminlegeneñ kürşeläre belän bergä böten töbäk öçen möhim buluına basım yasap, qardäş Qazaqstannıñ dialog yulı belän bu problemanı xäl itäçägenä ışanuın belderde.